Фарғона вилояти Тошлоқ туманидаги танасидан 16 дона игна топилган чақалоқнинг бугунги ҳолати, унинг соғлиги барчани қизиқтириши табиий.

Мурғак вужуди билан катта синовларни бошидан кечирган болажон истиқомат қиладиган “Меҳнатобод” маҳалла фуқаролар йиғинидаги хонадонда бўлдик. Азизбекдан хабар олиб, онаси Шоҳсанам билан суҳбатлашдик.  

Бу дунё сир-синоатларга тўла. Шоҳсанам 11 ойлик чақалоғи Азизбекнинг танасида игна борлигини эшитганда шок ҳолатига тушиб қолган эди. Республика шошилинч тиббий ёрдам илмий марказида шифокорларнинг саъй-ҳаракати билан мураккаб операция ўтказилиб, 11 дона игна олиб ташланди. Боланинг умуртқа, юрак орқаси ва бўйнида яна игналар қолган. Шифокорларнинг таъкидлашича, бола куч-қувватга тўлганда қолган игналар олиб ташланади.

Бу оила янги уй-жойга кўчиб ўтган, оила бошлиғи Азимжон Ҳудайбердиев мавсумий ишлар билан шуғулланади, Шоҳсанам эса Азизбекка қарайди. “Темир дафтар” га киритилган бу оилани туман ҳокимлиги имкон даражасида қўллаб-қувватламоқда. Томорқага иссиқхона қуриб берилди, уй-жойни таъмирлашга кўмаклашилди. Яқинда оила бошлиғига мотокультиватор ажратилди.  

Ҳаётга катта умидлар билан боқаётган бардошли жажжи қаҳрамонимиз Азизбек бугун  тўрт ярим ёшда. Инжиқликлари камайиб, “дада”, “ая” дея тили чиқиб қолган. Ўзи ҳаракатланишни бошлаган. Азизбек тумандаги 15-махсус давлат мактабгача таълим ташкилотига қабул қилиниб, у ерда ортопед, логопед каби мутахассислардан зарур муолажалар олмоқда.

Азизбекнинг танасига игналар қандай кириб қолгани ҳануз сирлигича қолмоқда. Ўша пайтда ҳам унинг баданида игна санчилганининг ҳеч қандай белгилари  кузатилмаган экан. Ижтимоий тармоқларда хабарлар тарқалгач, онанинг ҳаловати баттар бузилди. Турли савол-жавоблар, гап-сўзлар очиғи уни зериктирди. Унинг фикри хаёли фақат фарзандининг саломатлигида эди.  

– Боламни 8 ойлигида инжиқликлари кўпайиб, кўп касал бўла бошлади, – дейди Шоҳсанам. – Ўша пайтда ота уйимизда эдик. Турмуш ўртоғим Россияда ишларди. Даволандик, барибир яхши бўлмади. Вилоят болалар шифохонасида текшириб, танасида игналар борлигини айтишди. Буни эшитиб, шокка тушдим. Шифокорларга раҳмат. Боламга қайта яна ҳаёт берди. Рости ҳали ҳам Азизбекнинг танасига қандай қилиб игналар кириб қолганини тагига етолмайман. Озгина бўш қолсам, хаёлим шунга кетади.

Игна билан курашаётган Азизбекнинг соғлигини шифокорлар доимо назорат қилиб бормоқда.  

М. Сулаймонов, ЎзА