Мамлакатимизда сўнгги йилларда туризмни ривожлантириш, сайёҳлар оқимини ошириш ва уларга юқори даражада сервис хизматларини кўрсатиш борасида самарали ишлар олиб борилмоқда. Хусусан, 2013 йилда “Ўзбекистон темир йўллари” АЖ ҳамда Германиянинг “Lernidee Erlebnisrisen” туристик компанияси билан ҳамкорликда “Orient Silk Road Express” туристик чартер поезди қатнови йўлга қўйилган эди. Ўтган ўн йил мобайнида 80 дан ортиқ туристик чартер поезди ҳаракати йўлга қўйилиб, 10 минг нафарга яқин хорижлик сайёҳларга хизмат кўрсатилди.

Жорий йилнинг 3 сентябрь куни Қозоғистоннинг Олма-ота шаҳридан ўз ҳаракатини бошлаган “Orient Silk Road Express” номи остидаги навбатдаги туристик чартер поезди бугун Тошкент марказий темир йўл вокзалига етиб келди.

“Олма-ота — Бишкек — Тошкент — Қўқон — Қамаши — Китоб — Самарқанд — Хўжанд — Хива – Бухоро” йўналишида ҳаракатланаётган мазкур поездда АҚШ, Австрия, Малайзия, Швецария, Германия, Англия, Испания, Франция, Люксембург, Канада, Индонезия, Ирландия ва бошқа мамлакатлардан келган 100 нафарга яқин саёҳатчилар ўрин олган.

Поезд 12 та асосий вагон ва 1 та захира вагондан иборат бўлиб, барча вагонларнинг ички қисми миллий услубда безатилган. Ушбу туристик чартер поездида мамлатимизга келган саёҳатчилар 9 кун давомида юртимизнинг тарихий шаҳарларини томоша қиладилар. Шундан сўнг қўшни давлатларда сафарлари давом этади.

– Ўзбекистонда сўнгги йилларда бутунлай янгича тизим асосида изчил ислоҳотларнинг рўй бераётгани бугун чет элларда ҳам маълум, -дейди норвегиялик сайёҳ Анна Ларсен. – Шунинг учун ҳам мамлакатингизни ўз кўзи билан кўришга ҳавасманд кишилар бизда жуда кўп. Aйниқса, Самарқанд дейилса ҳар бир сайёҳ аввало қадимий “Буюк ипак йўли”ни ёдга олади. Ўйлайманки, сафаримиз кўпгина эсда қоларли хотираларга бой бўлади.

Яна бир муҳим жиҳатга эътибор қаратсак. Йўловчиларимизга янада қулайлик яратиш мақсадида бугун Тошкент марказий темир йўл вокзалида бир босқичли назорат пункти фойдаланишга топширилди. Бугунгача фақатгина Тошкентнинг жанубий вокзали, Самарқанд ва Наманган вилоятидаги вокзалларда ана шундай бир босқичли назорат пункти бор эди. Эндиликда Тошкент марказий темир йўл вокзалида ҳам йўловчилар бундай қулайликлардан кенг фойдаланишлари мумкин бўлади. Маълумотларга кўра, келгусида республикамиздаги барча темир йўл вокзалларида бир босқичли назорат ўтиш пунктлари жорий қилинади.

<iframe width="650" height="420" src="https://www.youtube.com/embed/Z_sbGDa7Jto" title="Тошкентга навбатдаги туристик чартер поезди етиб келди" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Ўткир Алимов, Фаррух Жўраев (видео), ЎзА