Метро нафақат транспорт тизими, балки туризм ривожида муҳим аҳамиятга эга. Маълумотларга кўра, 1966 йилдаги ҳалокатли зилзила сабаб Чилонзор метросининг 9 бекатдан иборат биринчи линияси қурилиш ишлари бошланган. Шунингдек, энг эски бекатлар бу Олмазордан Амир Темур хиёбонигача бўлган бекатлардир.

Чилонзор линиясининг узунлиги ўша йиллари 11,7 км.ни ташкил этган бўлса, бугунга келиб 59,5 км.га етган. 

«Тошкент метрополитени» ДУК матбуот хизмати раҳбари Тўйчи Мирзаевнинг маълум қилишича, бугунги кунда ҳаракатдаги вагонлар сони 256 та. Ҳар куни 64 та поезд 620-630 мингдан ортиқ йўловчини ташийди. Янги ҳаракат таркиблари харид қилинганидан сўнг мавжуд поездлар босқичма-босқич ёшартирилиши режалаштирилган.  

2001 йилдан буён «Мингўрик», «Юнус Ражабий», «Бодомзор», «Шаҳристон» «Минор», «Абдулла Қодирий» каби 6 та метро бекати барпо этилди.

Шунингдек, 2020 йилда Тошкент метрополитенининг 7 та ер усти ҳалқа йўли ва 5 та Сергели йўналиши ишга туширилди, Юнусобод йўналишига яна иккита бекат қўшилди. 2020 йилда қўшимча 14 та метро бекати қурилди. 

Янги метро бекатларининг барпо этилиши, йўналишларнинг шаҳримизнинг чекка қисмигача етказилиши кўпчиликнинг узоғини яқин, оғирини енгил қилди, десак хато бўлмайди.  

Хўш, бугунги кунда фойдаланишга топширилаётган метро станцияларининг хавфсизлиги қай даражада таъминланган? 

–  Тошкент метрополитенининг барча бекатлари 9 ва ундан юқори балли зилзилага бардошли этиб барпо этилган, – дейди Тўйчи Мирзаев. – Мавжуд метролар қор-ёмғирли мавсумларда мунтазам техник кўрикдан ўтказилади. Поездларни сақлаш ва таъмирлаш ишлари депода амалга оширилади. Депонинг техник хизмат кўрсатиш ва таъмирлаш мажмуаси ер усти устида жойлашган.

Ер усти ҳалқа йўналишининг 2-босқичи бўйича яна 7 метро бекати қурилиши давом этмоқда. Келгусида Қўйлиқ 7-метро бекатидан Сергели 5-метро бекатига уланади. 

Муҳайё Тошқораева ёзиб олди.  

ЎзА