Farmatsevtika tarmog‘ini rivojlantirish agentligiga “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” tomonida o‘tkazilgan ekspertiza natijalari yuzasidan xat kelib tushdi.

Ekspertizaga ko‘ra, Toshkent shahridagi ayrim dorixonalardan xarid qilingan “Neyromidin 20 mg. tabletki №50 tabletok” (seriya 40220, yaroqlilik muddati 02.2025, AO “Olaynfarm”) qalbakilashtirilgan dori vositasi ekanligi aniqlandi.  

Muvofiqlik sertifikatiga ega bo‘lmagan, davlat ro‘yxatidan o‘tmagan, qalbakilashtirilgan dori vositasi zudlik bilan muomaladan chiqarilishi hamda inson sog‘lig‘iga zararli ta’sirini tasdiqlovchi faktlar aniqlangan taqdirda muomaladan chiqarish va yo‘q qilish tartibi to‘g‘risidagi nizomda belgilanganidek yo‘q qilinishi bo‘yicha tegishli ko‘rsatma berildi.  

Amaldagi qonunchilikka ko‘ra, bu kabi huquqbuzarliklar ma’muriy va jinoiy javobgarliklar bilan bir qatorda litsenziya talab va shartlarining qo‘pol ravishda buzilishi deb baholanib, litsenziyaning bekor qilinishiga asos bo‘la oladi.

Sevara Tulyaganova,

Farmatsevtika tarmog‘ini rivojlantirish

agentligi matbuot kotibi

O‘zA