Яна бир неча кундан сўнг пойтахтимиз Тошкентда волейбол бўйича дунёнинг 24 та миллий терма жамоалари иштирокида U19 ёш тоифасидаги жаҳон чемпионати мусобақалари бошланади.

Мамлакатимиз спорт тарихида биринчи бор ўтказилаётган мазкур жаҳон чемпионати олдидан Миллий матбуот марказида анжуман ташкил этилди. Унда спорт вазири ўринбосари Ш.Маҳмудов, Ўзбекистон волейбол федерацияси раисининг ўринбосари Ж.Файзиев, Ички ишлар вазирлиги Жамоат хавфсизлиги департамент бошлиғи А.Мўйдинжонов, волейбол бўйича Ўзбекистон ўсмирлар терма жамоаси бош мураббийи Б.Моро ва бошқалар чемпионатга тайёргарлик ишлари хусусида сўз юритди. 

Журналистларнинг саволларига жавоб бериш асносида чемпионатда қатнашиш учун юртимизга келаётган хорижий терма жамоаларни кутиб олиш, жойлаштириш, ўйинлар бўлиб ўтадиган спорт мажмуалари атрофида жамоат хавфсизлигини таъминлаш, спортчилар саломатлиги, ўйинларни бошқариб борадиган ҳакамлар таркиби, Ўзбекистон терма жамоасининг чемпионатга ҳозирлик ҳолатлари каби бир қатор масалалар хусусида ахборот берилди. 

Таъкидланганидек, жорий йилнинг 21 июль-4 август кунлари 24 давлатнинг 388 нафар ёш волейболчиси, 56 нафар чет эллик ҳакам, 20 га яқин давлат волейбол федерацияси мутасаддилари, Халқаро волейбол федерацияси раҳбарлари, волейболга ихтисослашган бир қатор хорижий оммавий ахборот воситалари ходимлари Тошкентга келади. 

Чемпионатда қатнашадиган 24 миллий терма жамоа 6 тадан 4 та гуруҳга бўлинган ҳолда баҳслашади. Ўзбекистон терма жамоаси “А” гуруҳида Белгия, Аргентина, Пуэрта-Рико, Покистон ва Туркия жамоалари билан саралаш ўйинларини ўтказади. 

Ҳамюртларимиз биринчи ўйинни 24 июль куни Туркия жамоасига қарши ўтказса, 25 июлда Покистон, 26 июлда Пуэрта-Рико, 28 июлда Аргентина, 29 июлда Бельгия билан рўбарў келади. 

Матбуот анжуманида айтилганидек, дунё волейбол ишқибозларининг эътиборини ўзига қаратаётган чемпионат ушбу спорт турининг келажак юлдузлари сифатида кўрилаётган бир қатор ёш иқтидор эгаларини Тошкентда жамлаётгани билан эътиборлидир. 

Таъкидланганидек, мазкур жаҳон чемпионати янгиланаётган Ўзбекистоннинг халқаро обрў-эътибори юксалишига, юртимиз волейбол жамоаларида ўзига бўлган ишончнинг ортишига хизмат қилади.

<iframe width="650" height="420" src="https://www.youtube.com/embed/Tu3L0rIVxZs" title="Toshkentda jahonning eng kuchli voleybol jamoalari aniqlanadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Т.Рўзиев, С.Тошпўлатов, А.Содиқов (видео), У.Тўхтаев (монтаж), ЎзА