Пойтахтимиздаги Республика Олимпия захиралари теннис мактабида "Олимпия бирдамлиги" дастури асосида теннис мураббийлари учун семинар ўтказилмоқда.
Ўзбекистон миллий олимпия қўмитаси, мамлакатимиз теннис федерацияси ва Халқаро теннис федерацияси билан ҳамкорликда ташкил этилган ушбу лойиҳада юртимизнинг турли ҳудудларидан жалб этилган мутахассислар билан бир қаторда, Қозоғистон, Қирғизистон ва Ироқдан келган 16 нафар мураббийлар ўз салоҳиятларини янада оширмоқда.
Жорий йилнинг 30 июль кунига қадар давом этадиган семинарда иштирокчилар ёш теннисчиларни ўқитишнинг замонавий методикаси, уларга тўғри жисмоний юкламалар бериш, уларнинг психологияси билан ишлаш, техник ҳаракатларни бехато бажаришга ўргатиш каби йўналишлар бўйича малакаларини назарий ва амалий дарсларда оширади.
Семинарни Халқаро теннис федерацияси томонидан жалб этилган экспертлар - эронлик Сейдемир Борғеи, филиппинлик Краут Питер ҳамда ҳамюртимиз Игорь Шелякин олиб бормоқда.
Жавоҳир ТОШХЎЖАЕВ, ЎзА