Мамлакатимизда аралаш жанг санъатлари ассоциациясининг ташкил этилиши, ҳаваскорлар ва профессионаллар ўртасида рейтинг жангларининг ўтказилаётгани Ўзбекистон спортининг янги саҳифаси очилганлигидан далолат.

Боиси, ҳозир дунёнинг 150 дан зиёд давлатидаги ёшларнинг энг севимли спорт турларидан бирига айланган аралаш жанг санъатларига қизиқиш юртимиз вакилларида ҳам ортиб бораётганлиги ҳамюртларимизнинг халқаро мусобақаларда иштирокида, мамлакатимизда ўтказилаётган мусобақаларда ўз аксини топмоқда.

Яқинда Нукус шаҳрида Марказий Осиё чемпионатининг муваффақиятли ўтказилганлиги ва ушбу турнирга халқаро спорт оламининг эътибори ҳам бунинг яққол далилидир.

Миллий олимпия қўмитаси, Ўзбекистон аралаш жанг санъатлари ассоциацияси ҳамда “Murоdov professional league” клуби  жорий йилнинг 22 октябрь куни пойтахтимиздаги “Юнусобод” спорт мажмуасида аралаш жанг санъатлари бўйича яна бир нуфузли мусобақани ташкил этиш ташаббусини илгари сурди.

Шу муносабат билан  16 октябрь куни Миллий олимпия қўмитасида матбуот анжумани ўтказилди.

Унда иштирок этган Ўзбекистон миллий олимпия қўмитаси бош котиби Ойбек Қосимов, “Murоdov professional league” клуби раҳбари, UFC бўйича халқаро майдонда номдор спортчи Маҳмуд Муродов, мамлакат аралаш жанг санъатлари ассоциацияси мутасаддилари журналистларни қизиқтирган саволларга жавоб беришди.

Анжуманда юртимизда соғлом турмуш тарзини оммавийлаштириш, матонатли спортчиларни тайёрлашнинг янгича тизимини жорий этишда доимий тарзда спорт мусобақалари ўтказиб бориш, янги-янги спорт клублари ташкил этиш, уларнинг мамлакат спорт ҳаётидаги фаоллигини ошириш муҳим аҳамият касб этиши айтилди.  

Мазкур иш жараёнлари натижасида фаолияти йўлга қўйилаётган “Murоdov professional league” спорт клуби шу йилнинг бошида ташкил этилган бўлиб, унинг асосий мақсади ёшларни спортга кенг жалб этишга қаратилган. Қолаверса, аралаш жанг санъатлари(MMA) спорт турининг оммавийлигини ошириш мақсадида профессионал спортга энди-энди қадам ташлаётган ўсмирлар ва ёшлар учун катта мусобақалар олдидан ўзига хос кўрик ва синов вазифасини ўтаб берадиган турнирлар уюштиришдан иборат.

Бундан ташқари, ушбу мусобақаларни ўтказиш орқали аралаш жанг санъат спорти бўйича хорижий мамлакатларда фаолият олиб бораётган юртдошларимизни Ўзбекистон спорт майдонларида ўтадиган яккакураш турнирларига кенг жалб этиш, улардаги ватанпарварлик ҳиссини янада жонлантиришга қаратилган.

Шунингдек, юртимизда мазкур йўналишда илк бор ўтадиган ушбу турнирда жаҳон яккакураш оламида таниқли бўлган спорт юлдузларининг қатнашиши йўлга қўйилиши режалаштирилган.

Қизғин савол ва жавобларга бой бўлган анжуманда таъкидланганидек, 22 октябрь куни “Юнусобод” спорт мажмуасидаги аралаш жанг санъатлари мусобақасида яккакураш мухлисларига яхши таниш бўлган Богдан Гусков ва Баха Бакиев жанглари билан бирга бир қатор ёш спортчилар ўз маҳоратларини намойиш қилишади.

Турнирнинг асосий жангларида жаҳон спорт майдонида ном қозониб келаётган ҳамюртларимиз Шохасан Мирзаматов ва Рамазон Темиров голиблик учун октагонга чиқишади.

Т. Рўзиев, ЎзА