Bugun poytaxtimizda O‘zbekiston – Pokiston biznes konferensiyasi va “International Achievement Awards and Business Opportunities Conference – 2025” g‘oliblarini taqdirlash marosimi bo‘lib o‘tdi.

Tadbir O‘zbekistonning Pokistondagi elchixonasi tashabbusi bilan Ravalpindi Savdo-sanoat palatasi – RCCI hamkorligida, O‘zbekiston hukumati va biznes tuzilmalari ko‘magida tashkil etildi. Konferensiya savdo-iqtisodiy hamkorlikni kengaytirish, investitsiya loyihalarini rivojlantirish va ikki mamlakat bizneslari o‘rtasida to‘g‘ridan-to‘g‘ri aloqalarni o‘rnatish maqsadida tashkil etildi. Xalqaro tadbirning birinchi kunida Toshkentda O‘zbekiston-Pokiston biznes forumi, V2V va V2G muzokaralari, shuningdek, O‘zbekistonning investitsiya va eksport salohiyati bo‘yicha taqdimotlar bo‘lib o‘tdi. Dasturning asosiy tadbiri xalqaro biznes integratsiyasini rivojlantirish va qo‘shma tashabbuslarni ilgari surishga katta hissa qo‘shgan kompaniya va tadbirkorlarni (International Achievement Awards) mukofotlash marosimi hisoblanadi.

Anjumanda yetakchi kompaniyalar, sanoat assotsiatsiyalari, investitsiya va logistika institutlarining 150 dan ortiq vakillaridan iborat Pokiston delegatsiyasi ishtirok etdi. Ular orasida RCCI prezidenti Usman Shavkat, vitse-prezidenti Fahad Barlas, RCCI raisi Shahraiz Ashraf Malik va boshqa nufuzli tadbirkorlar bor. Tadbir yakunida sanoat, turizm, aviaqatnovlar, IT, raqamli iqtisodiyot va fond bozori sohalarida memorandumlar, hamkorlik shartnomalarini imzolash rejalashtirildi. Bu yangi qo‘shma loyihalarni ishga tushirish va mintaqaviy bozorlarda O‘zbekiston va Pokiston bizneslarining ishtirokini kengaytirish imkonini beradi. O‘zbekistonning Pokistondagi elchixonasining sa’y-harakatlari natijasida ikki mamlakat tadbirkorlari o‘rtasida to‘g‘ridan-to‘g‘ri o‘zaro aloqalar uchun amaliy platforma yaratildi, bu esa konferensiyani  iqtisodiy munosabatlardagi eng muhim tadbirlardan biriga aylantirdi.  

B.Xudoyberdiyev, O‘zA