Аввал хабар берганимиздек, бугун, 20 декабрь куни пойтахтимиздаги "International Tashkent Hotel" меҳмонхонасида Халқаро оғир атлетика федерацияси (IWF)нинг навбатдаги конгресс йиғилиши бўлиб ўтди.

Ўзбекистон оғир атлетика федерацияси матбуот хизмати хабарига кўра, конгресс йиғилишида дунёнинг 150 га яқин давлатлари вакиллари қатнашмоқда. Уни Халқаро оғир атлетика федерацияси президенти Майкл Ирани олиб борди. 

Йиғилиш давомида 2021 йил мобайнида ўтган халқаро мусобақалар ва 2022 йилги спорт тадбирлари режаси муҳокама қилинди. Шунингдек, тадбирнинг эрталабки дастурида Халқаро оғир атлетика федерацияси ижроия қўмитаси аъзоси, Ўзбекистон оғир атлетика федерацияси раисининг биринчи ўринбосари Шахрулла Маҳмудов Тошкентда якунланган 86-жаҳон чемпионати натижалари хусусида маъруза қилди. 

Эпидемиологик мураккаб вазиятга қарамай оғир атлетика бўйича 2021 йилги жаҳон чемпионати Тошкентда ҳар томонлама юксак савияда ташкил этилгани, унда 74 давлатдан 408 нафар спортчи, 627 нафар иштирокчи қатнашгани халқаро спорт оламининг ўзига хос воқеаси сифатида эътироф этилди. 

Эътиборлиси, Тошкент супасидаги баҳслар натижасида 13 та янги жаҳон рекорди ўрнатилди. Бу, оғир атлетиканинг халқаро ривожида муҳим аҳамиятга эгадир.  

 

Тўлқин Рўзиев, ЎзА