Шу йилнинг 21-23 октябрь кунлари “Ўзэкспомарказ”да минтақанинг энг йирик икки халқаро кўргазмаси “UzEnergyExpo” ва “UzStroyExpo” қўшма экспозицияси бўлиб ўтмоқда. Мазкур тадбир соҳа мутахассислари, тадбиркорлар, йирик компания вакилларини бир майдонда жамлади.

Унда Беларусь, Италия, Индонезия, Эрон, Хитой, Корея Республикаси, Қирғизистон, Россия, Туркия ва Украина каби 12 та давлатдан 200 га яқин компания иштирок этмоқда.  

Айтиш керакки кейинги йилларда юртимиз энергетика ва қурилиш тармоғида  катта ўзгаришлар кузатилди ва бу омил кўргазма стендларида ҳам намоён бўлди. Зеро, “Ўзбекистон–2030” стратегиясини “Атроф-муҳитни асраш ва “яшил иқтисодиёт” йилида амалга оширишга оид давлат дастури тўғрисида”ги  Президент фармонида умумий қуввати 4.5 ГВт бўлган йирик қуёш ва шамол электр станциясини ишга тушириш, қуввати 785 мегаватт қуёш панелларини ўрнатиш, 225 мегаваттлик гидроэлектр станцияларини барпо этиш белгиланган. Шу боис кўргазма павильонларининг асосий қисмини қайта тикланувчи энергия манбааларини ишлаб чиқарадиган қурилмалар, батарейкалар, аккумуляторлар ва бошқа зарур ускуналар эгаллади.  

Кўргазма иштирокчиларининг 40% дан ортиғи “яшил энергетика” йўналишида фаолият юритувчи компаниялар бўлиб, улар қайта тикланувчи энергия ускуналарини ишлаб чиқариш ва етказиб бериш, қуёш ва шамол технологиялари, энергияни сақлаш ечимлари, энергия самарадорлиги, ёритиш ускуналари, автоматлаштириш, трансформаторлар ҳамда кабелли маҳсулотлар билан қатнашдилар.

Мазкур намойишлар республикамиз энергия тизимининг трансформациясига хизмат қиладиган янги лойиҳалар, илмий-техник ишланмалар,  етакчи халқаро ва маҳаллий компанияларнинг маҳсулотлари тақдимоти учун кенг майдон бўлди.

Қурилиш соҳасидаги кўргазмага ҳам қизиқиш юқори. Энергетика  билан параллел равишда, қурилиш ва архитектура йўналишлари мамлакатимизда кенг тараққий этмоқда. Бу борада давлатимиз раҳбари томонидан қабул қилинган  “Уй-жойлар қурилишини ва қурилиш материаллари саноатини қўллаб-қувватлашнинг қўшимча чора-тадбирлари тўғрисида”ги ва “Ўзбекистон Республикаси қурилиш тармоғини модернизация қилиш, жадал ва инновацион ривожлантиришнинг 2021-2025 йилларга мўлжалланган стратегиясини тасдиқлаш тўғрисида”ги ҳуқуқий ҳужжатлар муҳим асос бўлди. Ана шу жиҳатлар кўргазмада намойиш қилинаётган маҳсулотлар, хизматлар ва инновацияларда акс этди.

Унда қурилиш ва пардозлаш материаллари, техника, ускуна ҳамда қурилиш материаллари саноати учун мўлжалланган технологиялар кенг кўламда намойиш этилди. Шунингдек, муҳандислик коммуникациялари ва иссиқлик таъминоти тизимлари соҳасидаги инновацион ечимлар тақдим қилинди.

Бирлашган экспозиция иштирокчилари ва ташриф буюрувчиларга соҳадаги бугунги трендларни комплекс баҳолаш, янги ишланмалар билан танишиш ҳамда барқарор ривожланишнинг устувор йўналишлари ва давлат дастурлари доирасида ҳамкорлик истиқболларини муҳокама қилиш учун кенг имкон яратилди. 

<iframe width="640" height="420" src="https://www.youtube.com/embed/HaXUotj-0nU" title="Toshkentda energetika va qurilish sohalari ko‘rgazmasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Ойбек Давронов, Улуғбек Тўхтаев (видео), ЎзА