16-18 февраль кунлари “Янги Ўзбекистон” университетида AI Hackathon 2024 тадбири бўлиб ўтади. Унда иштирокчилар нейротармоқ соҳасидаги илғор ютуқлар билан танишишлари мумкин.

Хакатон доирасида экспертлар иштирокида мазкур йўналишдаги трендлар ва инновацияларга бағишланган анжуман, қатор тақдимотлар ва панель муҳокамалари ташкил этилади. Бундан ташқари, 60 миллион сўмлик мукофот жамғармасига эга танлов ўтказилиши ҳам кўзда тутилган. 

Ташкилотчиларнинг режасига кўра, тадбир талабалар, мутахассислар ва инновацияларга қизиқувчиларнинг эътиборини сунъий интеллект мавзусига жалб қилиши керак. Хакатон ғоялар алмашиш, истеъдодларни ривожлантириш ва машинада ўқитиш учун муҳим платформа бўлиб хизмат қилади. 

Роман БОНДАРЧУК тайёрлади, ЎзА