“Тошкент ёғ-мой комбинати” корхонаси ишчиларига 1 миллиарддан ортиқ иш ҳақи ундириб берилди
Мажбурий ижро бюросининг Яшнобод туман бўлими иш юритувига фуқаролик ишлари бўйича Миробод туманлараро судининг суд буйруқларига асосан қарздор “Тошкент ёғ–мой комбинати” ОАЖдан жами 209 нафар фуқаролар фойдасига тўланмай қолган 1 миллиард 491 миллион 852 сўм миқдорида иш ҳақи ундириш ҳақидаги ижро ишлари келиб тушди.
Ижро ҳужжатлари юзасидан Ўзбекистон Республикаси “Суд ҳужжатлари ва бошқа органлар ҳужжатларини ижро этиш тўғрисида”ги қонунининг 23-моддасига асосан ижро иши юритиш қўзғатилган ҳамда бирлаштирилган.
Ижрочилар томонидан қарздорнинг номига расмийлаштирилган мол-мулклар ўрганилиб, тегишли тартибда хатланган ҳамда қарздор ҳисоб-рақамларига банд солинган.
Олиб борилган мажбурий ижро ҳаракатлари давомида тўлов топшириқномаларга асосан ундирилиши лозим бўлган жами 1 миллиард 491 миллион 852 сўм миқдорида иш ҳақи тўлиқ ундирилди.
ЎзA