“O‘zbekfilm” kinokonsernida "Ipak yo‘li durdonasi Toshkent xalqaro kinofestivali arafasida kengaytirilgan matbuot anjumani o‘tkazildi.

Kinematografiya agentligi tomonidan tashkil etilgan mazkur tadbirda OAV vakillari va blogerlar ishtirok etdi.

Unda so‘z olganlar "Ipak yo‘li durdonasi Toshkent xalqaro kinofestivali haqida ma’lumot berar ekan, ushbu nufuzli tadbirda qatnashishi kutilayotgan xorijlik ishtirokchilar, yulduzli mehmonlar va Jahon kinosi kunlari dasturida namoyish etiladigan filmlar mohiyatiga ahamiyat qaratdi.

Anjumanda kinofestival faxriy mehmonlari, shu jumladan, Lyuk Besson, Stiven Sigal, Franko Nero, Jerar Deparde, Nikita Mixalkov, Mitxun Chakraborti, mashhur turk seriallari yulduzlari va boshqalar haqida to‘liq ma’lumot berildi.

Tadbirda Shvetsariya va qirg‘izistonlik kino ijodkorlari ham ishtirok etdi.

-Ushbu nufuzli kinofestivalda ishtirok etayotganimdan behad shodman. Men ilk bor o‘zbek tilida film oldim. Bu biroz qiyin bo‘ldi, lekin mazkur jarayon men uchun katta tajribadir. Shvetsariyaga borganimda bu yerda o‘rganganlarimni faoliyatimda qo‘llayman, - dedi shvetsariyalik rejissyor Vanya Tognola.

Qo‘shni Qirg‘iziston davlatidan kelgan rejissyor Qarash Jonishov o‘z fikrini shunday bildirdi.

- Qirg‘iz xalqi sizlarga samimiy salom yo‘lladi,- dedi u. - Tilimiz va madaniyatimiz yaqin bo‘lgani uchun bizga bu yerda ishlash qiyinchilik tug‘dirmadi. O‘ylaymanki, xalqaro kinofestival ijodkorlarni hamkorlikda ishlashga puxta zamin yaratadi.

Shundan so‘ng bir qator videoroliklar namoyish etildi. Jahon kinosi kunlari dasturi doirasida namoyish etiladigan 14 ta davlatda suratga olingan filmlar haqidagi video, shuningdek, "Toshkent xalqaro kinofestivalining 10 ta yorqin voqeasi" videoroligi namoyish etildi.

Shuningdek, bugun, 27 sentyabr kuni ishtirokchilar uchun ehson oshi ham berildi.

Eslatib o‘tamiz, Toshkent xalqaro kinofestivalining ochilish marosimi 28 sentyabr kuni yangi tashkil topgan Kinochilar uyida bo‘lib o‘tadi.

Nasiba ZIYODULLAEVA, O‘zA