O‘zbekiston Respublikasi Prezidenti saylovlari bilan bog‘liq siyosiy tadbirlar bilan bir qatorda, madaniy tadbirlarni jamlash uchun samarali platforma sifatida xizmat qilayotgan Xalqaro media xollda “Ipak yo‘li durdonasi” XIII Toshkent xalqaro kinofestivali natijalari” mavzuida konferensiyasi bo‘lib o‘tdi.
Diplomatik korpus va xalqaro tashkilotlar vakillari, O‘zbekiston va xorijiy davlatlarning yetakchi kino mutaxassislari, OAV vakillari va yoshlar ishtirok etgan ushbu tadbirda Toshkent kinofestivalining ahamiyati va uning kino san’ati rivoji yo‘lidagi roli alohida qayd etildi.
Uchrashuvda O‘zbekiston Respublikasi Bosh vazirining o‘rinbosari Aziz Abduhakimov, Kinematografiya agentligi bosh direktori Firdavs Abduxoliqov va Yaponiyaning mamlakatimizdagi elchisi Yoshinori Fudjiyama so‘z chiqdi.
–Aytish joizki, davlat rahbari tashabbusi bilan qayta tiklangan kinofestivalning muvaffaqiyatli o‘tkazilishi ko‘plab mutaxassislar va tashkilotlarning xizmatidir. Toshkent xalqaro kinofestivali mamlakat kino sanoati rivojiga davlat va qator tashkilotlar tomonidan amalga oshirilgan keng ko‘lamli sarmoya sifatida xizmat qiladi. Mazkur kinofestivalni o‘tkazishda faol qatnashgan mutaxassislarga O‘zbekiston Respublikasi Bosh vaziri nomidan faxriy yorliqlar topshirishga qaror qilindi. Ayniqsa, kinofestivalni tayyorlash va o‘tkazishda o‘z hissasini qo‘shgan xorijlik hamkasblarimizning xizmatlarini alohida ta’kidlashni istardim, - dedi Aziz Abduhakimov.
O‘zbekiston Kinematografiya agentligi bosh direktori Firdavs Abduxoliqov yig‘ilishning barcha ishtirokchilariga va kinofestivalni tayyorlashda faol ishtirok etgan barchaga minnatdorchilik bildirdi.
–Hozirda o‘zbek kinematografiyasi yanada rivojlanmoqda. O‘zbekistonning rivojlanish strategiyasi tufayli so‘nggi besh yilda kino sanoati ulkan yutuqlarga erishayotganini guvohi bo‘lmoqdamiz. Bu kabi fikrlar dunyoning yetakchi kino ekspertlariga tegishli. Shuningdek, kino sohasining rivojiga misol sifatida, kapital rekonstruksiya qilingan «O‘zbekfilm» binosining taqdimotini, 28 million AQSH dollari qiymatidagi yangi texnik jihozlarining keltirilishini, yangi Kino uyi, Kino muzeyi, oltita kinoteatr, Kino fondining yangi binosi va Butunrossiya Davlat kinematografiya institutining Toshkentdagi filiali ochilishi, milliy filmlarning ilk premeralari, milliy kinematografiya durdonalarining xorijiy mamlakatlardan qaytarilishi, o‘nlab mahorat darslari va uchrashuvlar, jahon kino yulduzlarining taqdimotlari va tadbirlarini ko‘rsatib o‘tishimiz mumkin. Bu kino sanoatida amalga oshirilayotgan keng ko‘lamli islohotlarni tasdiqlaydigan voqealarning to‘liq ro‘yxati emas. Amalga oshirilayotgan islohotlar O‘zbekiston Respublikasi Prezidenti Shavkat Mirziyoyevning ulkan qo‘llab-quvvatlashining yorqin natijasidir, - deb ta’kidladi Kinematografiya agentligi bosh direktori.
Mazkur ZOOM-konferensiyada turli mamlakatlar kinoijodkorlari ham kinofestival yakunlari haqida o‘z fikrini bildirdi.
Zoom-konferensiyada taniqli rejissyor Timur Bekmambetov, «Belarusfilm» kinostudiyasi bosh direktori Vladimir Karachevskiy, Qirg‘iziston Madaniyat, axborot va turizm vazirligi huzuridagi Kinematografiya boshqarmasi direktori Muktali Bektenaliyev, qirg‘iz kino tanqidchisi, kino tarixchisi, teleboshlovchi Gulbara Tolomushova, Eronning IRIB Media Trade distribyutorlik kompaniyasi ijrochi direktori Alireza Shaxruxi, “Roskino” rahbari Yevgeniya Markova, “Vittorio Strada” jamg‘armasi rahbari Olga Strada ishtirok etdi.
–Har tomonlama ajoyib tadbir tashkil etilgani uchun Rossiya tomoni nomidan minnatdorchilik bildirmoqchiman. Biz hammamiz O‘zbekiston qanchalik tez va jadal rivojlanib borayotganini o‘z ko‘zimiz bilan ko‘rib turibmiz, biz katta muvaffaqiyatlarga, jumladan, birgalikda amalga oshirilayotgan loyihalarning muvaffaqiyatiga ishonamiz. Bu to‘lqinni ko‘targaningiz va atrofdagilarga O‘zbekiston qanday kuch va potensialga egaligini eslatganingiz uchun tashakkur, - dedi Roskino rahbari Yevgeniya Markova.
Rejalar haqida gapirar ekan, Yevgeniya Markova quyidagi gaplarni aytib o‘tdi.
–Rossiyaga qaytganimizdan so‘ng, biz darhol qo‘shma loyihalarni amalga oshirish, kino sohasidagi kesishuv nuqtalarini topish haqida o‘ylay boshladik. Sankt-Peterburgda Rossiya va O‘zbekiston o‘rtasidagi koproduksiya bo‘yicha yirik tadbir bo‘lib o‘tishi kutilmoqda, – dedi u.
«Belarusfilm» bosh direktori Vladimir Karachevskiy ham Toshkent kinofestivalining amaliy ahamiyatini ta’kidlab, o‘tkazilgan yirik tadbirga bag‘ishlangan fikrlarini aytib o‘tdi.
– Mening yuragim O‘zbekistonda qolib ketdi, biz hali ham Toshkentda o‘tkazgan kunlarimiz haqidagi xotiralar bilan yashayapmiz. Belarus delegatsiyasi Toshkent xalqaro kinofestivaliga taklifnoma uchun samimiy minnatdorchilik so‘zlarini yetkazishimni so‘rashdi. Toshkentda men Minskda bo‘lib o‘tadigan “Listopad” kinofestivalida foydalanish mumkin bo‘lgan jihatlarni ko‘rdim. Kinofestivalda o‘zbekistonlik mehmonlar va kinoijodkorlar ham ishtirok etishadi. Shuningdek, biz ko-produksion loyihalarni amalga oshirish haqida muzokaralar olib borayapmiz, vatandoshingiz Topivoldiyev haqida film suratga olishni va Belarusda "O‘zbekiston kino kunlari" va O‘zbekistonda "Belarus kino kunlari"ni o‘tkazishni rejalashtiryapmiz, – dedi Karachevskiy.
Italiyaning “Vittorio Strada” jamg‘armasi rahbari Olga Strada Toshkent xalqaro kinofestivalini haqiqiy ilhom manbai deb atadi.
– Kinofestivalning ko‘lami hammada ijobiy taassurot qoldirdi. Fursatdan foydalanib, ushbu tadbir tashkilotchilariga o‘z minnatdorchiligimni bildirmoqchiman. Italiya bilan hamkorlikda kino mahsulotlarini yaratish bo‘yicha bir nechta takliflar kelib tushmoqda. O‘zbekiston - har xil janrdagi filmlar uchun ajoyib suratga olish maydoni sifatida xizmat qilishi mumkin, o‘ylaymanki, bu albatta xorijlik kinoijodkorlarni qiziqtiradi, – dedi Olga Strada.
Tadbirning barcha ishtirokchilari navbatdagi "Ipak yo‘li durdonasi" Toshkent xalqaro kinofestivalini intizorlik bilan kutayotganlarini ta’kidlab o‘tdi. O‘zbekiston Respublikasi Bosh vazirining o‘rinbosari Aziz Abduhakimov barcha ishtirokchilarni kelasi yilning kuzida o‘tkazilishi rejalashtirilgan kinofestivalga taklif etdi.
Eslatib o‘tamiz, "Ipak yo‘li durdonasi" Toshkent xalqaro kinofestivalida 300 dan ortiq ishtirokchi qatnashdi. O‘zbekiston Respublikasi bo‘ylab 40 ta lokatsiyadan foydalanildi. Lyuk Besson, Stiven Sigal, Jerar Deparde, Timur Bekmambetov, Pavel Priluchniy, Nikita Mixalkov, Randhir Kapur, Melisa Asli Pamuk, Nuri Bilige Seylan, Rob Minkoff, Franko Nero, Valter Afanasev, Aleksey Chadov kabi mashhur yulduzlar festival mehmoni bo‘ldi.
Tadbir yakunida yapon rejissyori Kiyosi Kurasavaning "Dunyoning bir chekkasi" filmining premerasi o‘tkazildi.
Nasiba Ziyodullayeva, O‘zA