24-26 март кунлари биринчи Тошкент халқаро инвестиция форуми (ТХИФ) бўлиб ўтади.
Дунёнинг турли мамлакатларининг ишбилармон ва сиёсий доиралар вакиллари Форум иштирокчилари ва меҳмонлари бўлади.
Ўзбекистон Республикаси Инвестициялар ва ташқи савдо вазирлиги берган маълумотларга кўра, айни пайтгача Форумда қатнашиш мақсадида дунёнинг 56 мамлакатидан 1,5 мингдан ортиқ киши, шу жумладан, хорижий оммавий ахборот воситалари вакиллари мурожаат қилди.
Форум халқаро кун тартибидаги муҳим воқеага айланади. Тадбир дастури панель сессиялари, алоҳида мавзуларга доир муҳокамалар ва давра суҳбатларига бой бўлиши кутилмоқда. Унинг давомида Ўзбекистон ва минтақа мамлакатларининг инвестициявий, савдо, саноат, транспорт ва транзит салоҳияти очиб берилади. Ижтимоий-иқтисодий ислоҳотларни амалга ошириш бўйича навбатдаги тадбирлар ҳақида маълумотлар берилади. Ҳукуматнинг мамлакатни стратегик ривожлантириш, хусусий секторни рағбатлантириш, халқаро алоқаларни мустаҳкамлаш ва бошқа йўналишларидаги устувор вазифалари белгиланиши кўзда тутилган.
Шунингдек, форумда Ўзбекистоннинг турли тармоқлари ва ҳудудларининг инвестициявий ва савдо имкониятлари, молия бозорини ривожлантириш истиқболлари, маҳаллий саноатни модернизация қилиш ва рақамлаштириш, савдони либераллаштириш ва мамлакатни минтақавий ва халқаро бозорларга интеграциялаш чора-тадбирлари тўғрисида тақдимотлар бўлиб ўтади.
Форум, шунингдек, муштарак мақсадларга жавоб берувчи лойиҳалар ва ташаббуслар доирасида ўзаро манфаатли ҳамкорликнинг истиқболлари ва амалий жиҳатларини муҳокама қилиш мақсадида икки томонлама учрашув ва музокараларни ўтказиш учун самарали майдонга айланади.
Форум тадбирлари Инвестициялар ва ташқи савдо вазирлигининг Youtube каналида, шунингдек, Facebook ва Instagram ижтимоий тармоқларидаги Вазирликнинг ахборот ресурсларида тўғридан-тўғри узатилади. Дунёнинг исталган нуқтасидан Интернетга уланган ҳар қандай томошабин трансляцияни томоша қилиш имкониятига эга бўлади.
Форумда қатнашиш учун 20 мартгача http://www.iift.uz сайтида рўйхатдан ўтиш мумкин.
Гўзал Сатторова, ЎзА