Шу кунларда барча ҳудудларда пилла ҳосилини териш мавсуми бошланди.

Ҳозир Тошкент вилоятида 8 та пиллани қайта ишлаш корхонаси фаолият юритади. Ушбу корхоналарга пилла етиштирадиган Бекобод, Бўка, Оққўрғон, Оҳангарон, Пискент, Янгийўл, Чиноз, Ўрта Чирчиқ, Юқори Чирчиқ, Қуйи Чирчиқ, Бўстонлиқ туманлари бириктириб берилган. 2021 йил мавсумида вилоятда 27 минг 302 қути ипак қурти уруғи парваришланиб, 1 минг 529 тонна тирик пилла етиштириш режалаштирилган.  

Жорий йилда пиллани қайта ишлаш ҳисобига жами 3 миллион 800 минг АҚШ доллари миқдорида экспорт ишлари амалга ошириш ҳам белгиланган. Хусусан, Пискент туманида пиллачилик тобора ривожланиб бораётган бўлиб, жорий йилда ҳудуд пиллакорлари томонидан жами 2 минг 440 қути қурт уруғи парвариш қилмоқда. Айни вақтда йилнинг илк ҳосили йиғиштириб, топшириляпти.

Туман “Агропилла” МЧЖ да мавсумнинг очилиш маросимига туман ҳокими ўринбосари Ғофур Алибоев, Жанубий Кореянинг “JINJUZ SILK СО” МЧЖ ипакчилик компаниясининг генерал директори Ли Сеонг Сонг, “Агропилла” МЧЖ туман филиали раҳбари Сарвар Мамиров, агроном ва пиллакорлар иштирок этди.

Пилла мавсумида биринчи бўлиб “кумуш тола” топширган Дўстбеков ҳудудидан “Пискент Агро Барака” фермер хўжалиги касаначилари, Шаҳноза Алимова, Мустақиллик ҳудудидан Ҳикматой Қурбоновага пул маблағи топширилди.

– Ўзбек пилласига талаб юқори, – дейди “JINJUZ SILK СО” МЧЖ ипакчилик компаниясининг генерал директори Ли Сеонг Сонг. – Пискентлик пиллакорлар билан алоқаларимиз мустаҳкам, келгусида ипакчилик соҳасидаги ишларимизни янада кенгайтиришни режалаштирганмиз.

– Кўп йиллардан буён пилла боқамиз, қоп-қора заррадан оппоқ товланган ипакка айлангунича қуртнинг бари феъл-атвори ёд бўлиб кетган, – дейди илғор пиллакор Ҳикматой Қурбонова. – Бир ойгина вақт ичида рўзғоримизга яхшигина фойда, ҳам уйда бўш ўтирмасдан иш билан банд бўлишимиз таъминланади.  

Жорий йилда пискентлик пиллакорлар жами 137 тонна тирик пилла етиштиришни режалаштирган. Дастлабки куннинг ўзида пиллахонага 2 тоннадан ортиқ пилла хомашёси топширилди.

Шунингдек, Ўрта Чирчиқ туман ҳокимлиги ва “Агропилла” МЧЖ томонидан жорий йилда пиллачилик соҳасида салмоқли ишлар амалга оширилмоқда. ҳудуддаги 168,3 гектар майдонда тут плантациялари мавжуд. Ўз навбатида, 2 минг 270 қути ипак қурти уруғидан, 127 тонна пилла ҳосили учун контракция шартномалари тузилди.

Мутахассисларнинг таъкидлашича, 1 қути ипак қурти уруғидан ўртача 56 килограмм пилла ҳосили олиш мўлжаллаган. “Ёриқ” маҳалласида яшовчи муқим ишсиз бўлган Адолат Қодирова туман ҳокимлигининг таклифини қабул қилиб, 2 қути ипак қурти уруғидан 120 килограмм пилла ҳосили топширди. Унинг 1 ойлик меҳнати эвазига 1 йиллик пуллик меҳнат стажига ва қўшимча даромадга эга бўлди.  

Мавсум бошидан буён шу кунга қадар 3 тонна пилла ҳосили хирмонларга топширилди. Маълумот учун, мавсум давомида 4 минг 500 дан ортиқ иш ўрни яратилди.

Абдулазиз Мусаев, ЎзА