Тошкент вилоятида бўшаб қолган депутатлик ўринлари учун сайловлар ўтказилмоқда
Жойларда сайлов жараёнлари пандемия шароитида карантин санитария қоидаларига катьий риоя қилган холда ташкил этилди.
Жорий йилнинг 27 сентябрь куни Тошкент вилоятининг Халқ депутатлари Чирчиқ шаҳри, Бўка, Тошкент ва Янгийўл туманлари Кенгашларига бўшаб қолган депутатлик ўринлари учун сайловлар ўтказиляпти.
Жойларда сайлов жараёнлари пандемия шароитида карантин санитария қоидаларига катьий риоя қилган холда ташкил этилди. Хусусан, барча сайлов участкаларига тиббиёт ходимлари, жамоат тартибини ва хавфсизлигини сақлаш учун масьуллар бириктирилган.
Хусусан, Халқ депутатлари Бўка туман Кенгашидаги бўшаб қолган “29-Кўкорол” сайлов округидаги депутатлик сайлови бўлиб ўтмоқда.
- Дам олиш куни бўлишига қарамай эрта тонгдан туман аҳолиси ўзлари танлаган номзодга овоз бериш учун кела бошлади, - дейди сайлов округи раҳбари Аброр Умиров. - Уларга 334-сайлов участкасига кириш қисмида бир янги ниқоб ва тиббий перчаткалар берилмоқда. Мазкур сайлов участкасида 1 минг 95 нафар сайловчи рўйхатга олинган. Шунингдек, имконияти чекланган фуқаронинг хонадонига сайлов участкаси аъзолари бориб, сайловчиларнинг ўзлари танлаган номзодга овоз беришини таъминламоқда.
