Мамлакатимиз Президенти ташаббуси билан ёшларга ер ажратиб бериш орқали улар ишга жалб қилиниб, йигит-қизлар бандлигини таъминлашнинг янги тизими жорий этилди. Ишлаб чиқилган манзилли дастурга кўра, жойларда бу тадбирга жиддий киришилмоқда.

Тошкент вилояти ҳокимлиги ахборот хизмати хабар беришича, яқинда Чиноз туманида ҳам ана шундай тарзда кўплаб йигит-қизларни иш билан таъминлашга бел боғланди. “Навоий” ҳудудида “Ғурур обод ифтихор“ фермер хўжалигида 30 ёшгача бўлган 9 нафар йигит-қизга 40 сотихдан ер ажратиб берилди. Айни пайтда адирликнинг қия қисмида жойлашган бу лалми ерларда ёшлар қовун экишни мўлжаллашяпти. Ҳосил йиғиштириб олингач, ўрнига иккинчи экин экилади.

Илгари ташландиқ ҳолатда бўлган ерлар бугунги кунда текисланиб, анча эпга келтирилди. Энди ёшлар бу ерга сув чиқариш юмушлари билан шуғулланишмоқда. Эрта-индин ерга уруғ қадалади. 60-70 кун ўтиб тилни ёрар асал қовунлар пишиб етилади.

– Ёшлар ишли бўлди, – деди фермер хўжалиги раҳбари С.Мадалиев. – Энди етиштирилган ҳосилни ҳам ўзлари сотишади. Демак, ер орқали улар оилаларини боқишади. Президентимиз ташаббуси билан ишлаб чиқилган бу янги тизим ёшларни иш билан таъминлашда айни муддао бўлди.