Toshkent viloyat hokimi Zoyir Mirzayev Xitoy Xalq Respublikasi Shandon provinsiyasining Dechjou shahri delegatsiyasi vakillari bilan savdo-iqtisodiy va sanoat, ishlab chiqarish, turizm aloqalarini yanada kengaytirish maqsadida uchrashuv o‘tkazdi.
Unda mehmonlarga mamlakatimizda tadbirkorlar va chet ellik investorlar uchun yaratilgan sharoitlar, berilgan bir qancha imtiyozlar xususida ma’lumot berildi. Muzokarada tomonlar Chirchiq shahrida sanoat zonasi qurilishiga kelishildi. Xitoylik mehmonlarga Toshkent viloyatining investitsion salohiyatini ko‘rsatuvchi videorolik namoyish etildi.
***
Viloyat bojxona boshqarmasi “G‘ishtko‘prik” chegara bojxona postiga qo‘shni davlatdan piyoda kirib kelgan fuqaroning qo‘l yuklari bojxona ko‘rigidan o‘tkazildi. Unda og‘zaki so‘rovda ma’lum qilinmagan va yo‘lovchi bojxona deklaratsiyasida yozib ko‘rsatilmagan qiymati 137 million 800 ming so‘m bo‘lgan 3 ming 445 dona dori vositalari borligi aniqlandi. Hozirda holat yuzasidan bojxona organlari tomonidan surishtiruv harakatlari olib borilmoqda.
***
Viloyatda ma’naviy muhit barqarorligini mustahkamlash, aholi, ayniqsa, yosh avlod ongi va qalbida yuksak fazilatlarni rivojlantirish maqsadida “Ma’naviyat maskan”lari foydalanishga topshirildi. Xususan, dekabr oyi davomida Toshkent, Bekobod, Yangiyo‘l, Zangiota, Oqqo‘rg‘on, Bo‘ka tumanlari hamda Angren, Yangiyo‘l shaharlarida yangi maskanlar foydalanishga topshirildi. Mazkur maskanlarda turli tadbirlar tashkil etish uchun barcha sharoitlar mavjud. Bu esa o‘z navbatida, aholining kitob mutolaasiga bo‘lgan qiziqishini yanada oshirish, kitobxonlik madaniyatini yuksaltirish hamda yoshlarning ma’naviy dunyosini boyitish yo‘lida xizmat qilishi shubhasiz.
***
Toshkent viloyatining 17 ta shahar va tuman hokimliklari tomonidan “Yashil bog‘” barpo etish uchun 20,68 gektar yer maydoni doimiy foydalanish huquqi bilan ajratildi. Ajratilgan yer maydonlari hududini obodonlashtirish va ko‘kalamzorlashtirish, suvni tejaydigan texnologiyalarni qo‘llagan holda sug‘orish tizimlarini barpo etishni tashkil qilish ko‘zda tutilgan.
A.Musayev,O‘zA.