Қуйи Чирчиқдаги “Беруний” маҳалла фуқаролар йиғинида 30 оилага замонавий ва барча қулайликларга эга хонадон калитлари топширилди.

Шу муносабат билан ташкил этилган маросимда туман сектор раҳбарлари, масъуллар, нуронийлар, ёшлар ҳамда кенг жамоатчилик вакиллари иштирок этди. Хотин-қизлар муаммоларини тизимли равишда ҳал этиш, уларни ижтимоий қўллаб-қувватлаш бўйича маҳаллий бюджет ҳамда ҳомийлар маблағи ҳисобидан таъмирланган уйлар “Аёллар дафтари” га киритилган ўн нафар ва йигирма нафар ижтимоий аҳволи оғир хотин-қизларга имтиёзли кредит асосида расмийлаштирилди.  

Мазкур ҳудудда уч қаватли бино беш миллиард сўм эвазига тўлиқ таъмирланди. Зарур жиҳозлар билан таъминланиб, аҳоли ихтиёрига топширилди.  

* * *

Тошкент давлат аграр университетида “AgroStartUp 2023" стартап лойиҳа ва ғоялар танлови ғолиблари тақдирланди.  

Президентимизнинг 2018 йил 5 июндаги “Олий таълим муассасаларида таълим сифатини ошириш ва уларнинг мамлакатда амалга оширилаётган кенг қамровли ислоҳотларда фаол иштирокини таъминлаш бўйича чора-тадбирлар тўғрисида” ги қарорига асосан ташкил этилган мазкур билимлар синовида юздан ортиқ талаба ва ёш олимларнинг лойиҳалари кўриб чиқилди. Иштирокчилар юз баллик мезонда баҳоланди ва йигирма нафар истиқболли лойиҳа эгаси ғолиб бўлди. 90-100 баллгача бўлган бир нафар докторант биринчи, 80-90 балл тўплаган олти нафар талабалар 2-ўрин, 75-80 балл тўплаган ўн уч нафар иштирокчи 3-ўринни эгаллади. Ғолибларга ҳомийлар томонидан диплом ва пул мукофотлари топширилди.  

* * *

Ўзбекистон давлат жисмоний тарбия ва спорт университетида спортнинг регби -7 тури бўйича аёллар ўртасида “Универсиада – 2022” спорт мусобақаларининг Республика финал босқичи бўлиб ўтди.  

Баҳсларда 12 вилоятдан қатнашган жамоалар тўрт гуруҳга бўлиниб, ўзаро ғолиблик учун баҳслашди. Якунда ҳакамлар томонидан юқори натижаларга эришган жамоалар аниқланди. 1-ўрин Тошкент вилояти жамоасига, 2-ўрин Наманган вилояти жамоасига, 3-ўрин эса Хоразм вилояти жамоасига насиб этди. Ғолиблар ташкилотчилар томонидан медаль, диплом ва қимматбаҳо совғалар билан тақдирланди.  

А.Мусаев, ЎзА