Ўзбекистон Республикаси Президенти “Тошкент шаҳрида транспорт тизими бошқарувини такомиллаштириш ҳамда тирбандликларнинг олдини олишга қаратилган қўшимча чора- тадбирлар тўғрисида” қарор қабул қилди.

Унга мувофиқ, қуйидагилар Тошкент шаҳрида транспорт тизими бошқарувини такомиллаштириш ҳамда тирбандликларнинг олдини олиш бўйича устувор йўналишлар этиб белгиланди: 

а) илмий ёндашув, илғор хорижий тажриба ва рақамли технологияларни қўллаган ҳолда Тошкент шаҳрида йўл ҳаракатини ташкил этишнинг замонавий техник ечимларини ишлаб чиқиш орқали транспорт оқимини самарали бошқариш ва тирбандликнинг олдини олишга қаратилган чора-тадбирларни амалга ошириш; 

б) Тошкент шаҳрининг транспорт инфратузилмасини ривожлантириш лойиҳаларини ишлаб чиқиш ва амалиётга жорий этиш; 

в) жамоат транспорти ҳаракатини ташкил этиш ва тартибга солиш, унинг жозибадорлигини ошириш; 

г) Тошкент шаҳри кўчаларида йўл ҳаракатини ташкил этишнинг техник воситаларини ўрнатиш, алмаштириш, сақлаш ва уларга техник хизмат кўрсатиш ишларини амалга ошириш, шунингдек, ушбу ишларга аутсорсинг асосида хусусий секторни жалб қилиш; 

(д) йўл ҳаракати иштирокчиларининг транспорт маданиятини ошириш ва йўл ҳаракати қоидаларига риоя этилишини таъминлашга қаратилган тартибот ишларини амалга ошириш. 

Қарор билан Тошкент шаҳри транспорт тизимини 2030 йилгача ривожлантиришнинг қуйидаги мақсадли кўрсаткичлари тасдиқланди:

а) аҳолининг жамоат транспортидан фойдаланиш даражасини 60 фоизга етказиш; 

б) электробусларнинг жамоат транспортидаги улушини 50 фоизга етказиш; 

в) автобуснинг ўртача ҳаракат тезлигини 18 км соатдан 24 км соатга етказиш; 

г) метрополитен тармоғи узунлигини 103 кмга етказиш;

д) Тошкент шаҳридаги 1000 км автомобиль йўлларини таъмирлаш ишларини ташкил этиш; 

ж) транспорт воситалари учун 150 минг ўринли тўхтаб туриш жойларини ташкил этиш;

з) 16 та йўл ўтказгич ва тоннеллар барпо этиш; 

и) 2 600 та автобус бекатларини намунавий лойиҳа асосида реконструкция қилиш; 

к) ягона бошқарув тизимига эга интеллектуал светофорлар билан жиҳозланган "ақлли" чорраҳалар сонини 700 тага етказиш; 

л) 200 км пиёдалар йўлаги ва 170 км велосипедлар учун махсус йўлаклар ташкил этиш. 

ЎзА