Пойтахтимизда экологик барқарорликни таъминлаш, қурилиш жараёнида экологик меъёрларга риоя қилиниши устидан назоратни кучайтириш мақсадида Миробод туманида навбатдаги кундузги эко-рейд ташкил этилди. Тадбир давомида мутасадди идоралар ходимлари қурилиш объектларининг экологик талаблар бўйича ҳолатини ўрганди.

Ўтказилган рейдда қурилиш фаолияти олиб бораётган корхоналар ва ишчи бригадаларга экологик тартиб-қоидаларга қатъий амал қилиш зарурлиги эслатилди. Хусусан, қурилиш чиқиндиларини белгиланган жойларга олиб чиқиш, ҳавога чанг ва бошқа зарарли моддалар тарқалишининг олдини олиш бўйича кўрсатмалар берилди.

Шу билан бирга, айрим объектларда белгиланган талабларга амал қилинмагани аниқланди. Жумладан, туманнинг Зарафшон кўчасида жойлашган қурилиш майдонида экологик меъёрларга риоя этилмай, чанг чиқиши камайтирилмаган ҳолда ишлар давом эттирилгани қайд этилди. Бу ҳолат атроф-муҳит ва аҳоли саломатлигига салбий таъсир кўрсатиши мумкинлиги таъкидланди.

Аниқланган қоидабузарлик ҳолатига нисбатан туман экология бошқармаси ва тегишли ташкилотлар ходимлари томонидан баённома расмийлаштирилди ҳамда белгиланган тартибда жарима чораси қўлланди.

Мутахассислар қурилиш субъектларини экологик хавфсизлик талабларига масъулият билан ёндашишга, иш жараёнида атроф-муҳитни муҳофаза қилиш бўйича белгиланган қоидаларга қатъий амал қилишга чақирди.

<iframe width="560" height="315" src="https://www.youtube.com/embed/xnElU3FTXTM?si=NNV4-clnUXlg3t3Q" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ҳамроз Баянов,

О.Давронов (видео),

У.Тўхтаев (монтаж),

ЎзА