Ўзбекистонда илк маротаба метро йўловчилари учун Тошкент метрополитенининг “Чилонзор” бекатида она ва бола хонаси ҳамда ҳожатхона барпо этилиб, фойдаланишга топширилди.

Ушбу хоналар замон талабларига мос равишда барпо этилган бўлиб, қатор қулай ускуналар билан жиҳозланган. Шунингдек, ҳаво алмаштирувчи тизим ҳамда канализация қувурлари шаҳарсозлик нормаларига мос равишда ўрнатилган. Бундан ташқари, ёш болали оналар учун ҳам зарур жиҳозлар жойлаштирилган.  

Яна бир қулайликлардан бири, фойдаланувчилар учун гигиеник воситаларнинг мавжудлигидир. Ушбу хона “Тошкент метрополитени” давлат унитар корхонаси ҳамда “Ундергроунд сервис” масъулияти чеклаган жамият билан ҳамкорликда қурилган бўлиб, иккинчи Жаҳон уруши қатнашчилари, ногиронлиги мавжуд фуқаролар бепул фойдаланишлари мумкин. Шунингдек, Чернобил фалокати иштирокчилари, ҳуқуқни муҳофаза қилувчи орган ходимлари ва Ёшлар иттифоқи етакчилари ва 7 ёшгача бўлган болалар учун ҳам бепул фойдаланиш имконияти мавжуд. 

Ушбу она ва бола хонаси ҳамда ҳожатхона синов тариқасида қурилган бўлиб, натижа кўзланганидек бўлса, йўловчилар оқими кўп бўлган яна 14  та метро бекатида ҳам барпо этилиши режага киритилган. 

Файзулло Яҳёев, ЎзА