Тошкент метрополитени 1977 йил 6 ноябрда ўз фаолиятини бошлаган ва шу кундан буён ҳар куни тонгги соат 05:00 дан йўловчиларга ўз эшикларини очмоқда.

Мана шу давр мобайнида метрополитеннинг асосий мақсади йўловчиларга хавфсиз ҳамда сифатли транспорт хизматини кўрсатишдир.  

Дастлаб, 1 та йўналиш ва 9 та бекатдан иборат бўлган метрополитенда ҳозиргача 4 та йўналиш ҳамда 48 та бекат барпо этилди.  

Қайд этиш жоизки, давлатимиз раҳбари ташаббуси билан 3 йил олдин 29 тани ташкил этган бекатлар сони бугунги кунга келиб, 48 тага етказилди.  

Умумий метро йўли узунлиги эса 39 кмдан 67 кмга узайтирилди. Бундан ташқари яна 2 та метро бекати барпо этилиши билан метро йўли узунлиги 70 кмдан оширилиши режалаштирилган.  

Бекатлар сони ортгани сари йўловчиларнинг метрога бўлган талаблари ҳам ортиб бормоқда.  

Жумладан, ўтган вақт мобайнида кунига 250-280 минг нафар аҳолига хизмат қилган Тошкент метрополитени ҳозирги кунда 600 мингдан зиёд йўловчини ўз манзилига етказмоқда.  

Йўловчиларга тез, қулай ҳамда сифатли хизмат кўрсатишда метро ходимларининг ўрни алоҳида аҳамиятга эга. Бу борада рақамларга мурожаат қиладиган бўлсак, дастлабки йилларда ходимларнинг сони салкам 1700 нафарни ташкил этган бўлса, ҳозирги кунда ушбу кўрсатгич 5600 дан ошди.  

Тошкент шаҳридаги энг қулай транспорт воситаларидан бирига айланиб улгурган, шаҳарсозлик нормалари асосида барпо этилган метро бу йил 46 ёшни қарши олди.  

Муҳайё Тошқораева,  

ЎзА