Жорий йилнинг 29-30 май кунлари Ўзбекистонда тўртинчи бор “Тошкент ҳуқуқ баҳори” (“Tashkent Law Spring”) халқаро юридик форуми бўлиб ўтади.

Шу муносабат билан АОКАда Адлия вазирлиги раҳбарияти иштирокида матбуот анжумани ташкил этилди. 

2019 йилдан буён ҳар икки йилда бир маротаба ташкил этиб келинаётган ушбу форум бугунги кунга келиб Марказий Осиёда ҳуқуқ ва бизнес соҳасидаги энг муҳим платформалардан бирига айлангани қайд этилди. 

“Рақамли технологиялар даври: келажакка ҳуқуқий назар” – форумнинг асосий мавзуси сифатида танлаган. 

Форумда замонавий рақамли технологиялар, хусусан, сунъий интеллект ва унинг ҳуқуқий соҳаларга татбиқ этилиши, рақамли тартибга солишнинг истиқболлари каби долзарб масалалар муҳокама қилинади. 

Форумда 40 дан ортиқ давлатдан адлия вазирлари, тартибга солувчи органлар вакиллари, йирик халқаро ҳуқуқшунослар, Legal Tech соҳасининг етакчи экспертлари, IT мутахассислар ҳамда бизнес вакиллари иштирок этиши кутилмоқда. 

Асосий тадбирларда бири – эксклюзив инсайтларда рақамли тартибга солиш бўйича глобал етакчилар томонидан замонавий тенденциялар таҳлил қилинади.

Мастер-классларда суд экспертизаси, медиация, арбитраж ва коррупцияга қарши назорат масалалари юзасидан илғор тажрибалар билан ўртоқлашилади.

Ёшлар форумида Тошкент давлат юридик университетида ёш ҳуқуқшунослар ва талабалар иштирокида ҳуқуқни рақамлаштириш истиқболлари муҳокама қилинади. 

Форум халқаро ҳамкорликни мустаҳкамлаш, ҳуқуқий инновациялар алмашинуви ва замонавий технологиялар билан уйғунлашган ҳуқуқий тизим барпо этишда муҳим платформа бўлиб хизмат қилади.

Н.Абдураимова, ЎзА