ISO 37001:2016 – ташкилотда коррупцияга қарши курашишнинг самарали тизимини яратишнинг халқаро усулларини ўзида жамлаган, коррупцияга қарши мукаммал бошқарув тизимини йўлга қўйишга хизмат қиладиган халқаро стандарт.

Бу стандарт коррупцияга қарши бошқарув тизимини ишлаб чиқиш, жорий этиш, қўллаб-қувватлаш, таҳлил қилиш ва такомиллаштириш учун талаб ва кўрсатмаларни белгилайди. 

Ҳозирги кунда бу сертификатни мамлакатимиздаги 50 дан ортиқ вазирлик вa идора қўлга киритган. 

Таълим тизимида эса бу сертификатни илк бор Тошкент давлат юридик университети қўлга киритди. 

Эндиликда мазкур университетнинг фаолияти Коррупцияга қарши кураш менежменти тизимининг халқаро стандартларга мувофиқлигини билдиради. Ўз навбатида, бу таълим даргоҳига барча даражалардаги бошқарув аппаратига шаффофлик вa очиқликни таъминлаш юзасидан катта масъулиятни юклайди. 

Коррупцияга қарши курашиш агентлиги, Адлия вазирлиги, Тошкент давлат юридик университети раҳбарияти ҳамда сертификатлаштириш органи ходимлари иштирокида ушбу сертификатни тантанали топшириш маросими бўлиб ўтди. 

Мазкур сертификатни қўлга киритиш масаласи Коррупцияга қарши курашиш агентлиги вa Тошкент давлат юридик университети ўртасида имзоланган меморандум ва чора-тадбирларда кўзда тутилган эди. 

Ўтган давр мобайнида Агентлик тавсиялари вa услубий кўмаги натижасида университетда стандарт талаблари бажарилди ва ижобий натижага эришилди. 

Н.Абдураимова, ЎзА