Тошкент шаҳар ҳокимлиги ташаббуси билан ўтказилаётган “Тошкент: беш ташаббус” ҳаракатининг учинчи кунида ёш иштирокчилар ва меҳмонлар билан таниқли сиёсатчилар, спортчилар ва жамоат арбобларининг учрашувлари ташкил этилди.

Тошкент шаҳар ҳокимлиги ахборот хизматининг хабар беришича, веб-сайт ва телеграм-бот орқали рўйхатдан ўтган фойдаланувчилар сони аллақачон 65 минг кишидан ошди.

23 май куни Беш ташаббус ҳаракати майдонида очиқ мулоқотлар бўлиб ўтди, унда Қонунчилик палатаси Спикерининг Рақамли ривожланиш ва ахборот сиёсати масалалари бўйича ўринбосари Одилжон Тожиев, шунингдек, депутатлар Расул Кушербаев ва Дониёр Ғаниевлар ҳам иштирок этишди.

Норасмий руҳда ўтган учрашувда ёшлар сиёсатчиларга ўзларини қизиқтирган саволлар билан мурожаат қилиш имкониятига эга бўлдилар.

Масалан, учрашув иштирокчилари нима учун депутат бўлишга интилиб, ҳаётини сиёсий фаолият билан боғлайдиган ёшларнинг улуши кам эканига қизиқишди.

–Депутат дегани бу қандайдир мансаб эмас, депутат бу ишонч дегани, мамлакат одамларининг вакили сифатида сиёсий жараёнларга қатнашиш дегани, – деди Д. Ғаниев.

Мулоқот давомида депутат Расул Кушербаев депутатларни халқ танимаслиги, уларнинг кўриниш бермаслиги ҳақида берилган саволга жавоб бераркан, марказий телеканалларни кўришни тавсия қилди.

Узоқ кутилган учрашувлардан яна бири – Миллий олимпия қўмитаси вице-президенти Равшан Эрматовнинг ёшлар билан мулоқоти бўлди. Иштирокчилар собиқ футболчи ва мураббий, афсонавий рефери билан юзма-юз мулоқотдан беҳад хурсанд бўлишди.

Равшан Эрматов ҳақамлик фаолиятини қандай бошлагани, муваффақият сирлари ҳақида гапириб берди:

– Мен тўйларни, оилавий тадбирларни ўтказиб юборгандирман, лекин ҳеч қачон машғулотлардан қолмаганман, – деди Р. Эрматов ўз ишига содиқлик ҳақида гапирар экан. – Мен муваффақиятга фақатгина кучли хоҳиш ва меҳнат билан эришиш мумкин, деб ҳисоблайман.

Шунингдек, таниқли рефери фаолиятида дуч келган қийинчиликлари ҳақида ҳикоя қилиб берди:

– Мен ҳакамликни жангга қиёслайман. Карьера учун ўзини қурбон қилишга тайёр инсонгина ҳақиқий ҳакам бўла олади. Футбол шунақа. У ҳамма ерда бир хил. Ҳар бир ўйиндан кейин миллионлаб изоҳлар ёзилади. Ўзбекистонлик ҳакам жаҳон чемпионати ўйинларини бошқариши эълон қилинганида 10 миллиондан ортиқ изоҳлар қолдирилган ва уларнинг ҳаммаси салбий бўлган. Аммо буларнинг барчаси мени янада кучлироқ қилди, катта туртки берди. Ўшанда мен олдинга боришимиз кераклигини ва тўғри йўлда эканлигимни англадим, – деди Р. Эрматов.

Учрашув якунида Равшан Эрматов ишонч билан Ўзбекистон албатта футбол бўйича жаҳон чемпионатига чиқиши ҳақида гапирди. “Мен ҳам бунга ишонишни хоҳлайман. Мен ҳам футбол мухлисиман. Ўзбекистон терма жамоаси ютқазганида, мен ҳам чуқур қайғуга тушаман”, дея ўз ҳиссиётлари билан ўртоқлашди у.

Шунингдек, кун давомида ёшлар Бандлик ва меҳнат муносабатлари вазири Нозим Ҳусанов билан ҳам учрашди.

Файзулло Яҳёев, ЎзА