Пойтахтимиздаги «Универсал» спорт саройида эркин ва юнон-рум кураши бўйича катталар ўртасидаги Ўзбекистон чемпионати бошланди.

Миллий олимпия қўмитаси хабарига кўра, Қорақалпоғистон Республикаси, вилоятлар ҳамда пойтахтимизнинг 400 нафарга яқин курашчилари қатнашаётган чемпионат мусобақалари тўрт кун давом этади.

Мусобақаларнинг дастлабки икки кунида юнон-рум курашчилари, кейинги икки кунида эса эркин курашчилар ўз вазнларида ғолиблик учун гиламга чиқади.

Баҳсларда Токиода ўтган олимпия ўйинлари иштирокчилари, ёшлар ўртасидаги нуфузли турнирларнинг ғолиблари ҳамда ўнлаб иқтидорли ёшларнинг қатнашаётганлиги чемпионатнинг ҳар бир вазнидаги беллашувлар муросасиз ўтишидан далолат бермоқда.

Чемпионат дастурига биноан бугун, 21 декабрь куни юнон-рум курашида 55, 63, 77, 87 ва 130 килограмм вазн тоифаларида баҳслар ўтказилади.

Тўлқин Рўзиев, ЎзА