Шу кунларда давлатимиз раҳбарининг топшириғига кўра юртимиз бўйлаб экологик вазиятни яхшилаш мақсадида “Яшил макон” умуммиллий лойиҳаси амалга оширилиб, ҳудудларда минглаб мевали ва манзарали кўчатлар экилмоқда.

Хусусан, Ипакчилик ва жун саноатини ривожлантириш қўмитаси томонидан ҳам лойиҳа доирасида тут дарахтларини экиш ва тутзорларни парваришлаш ишлари барча ҳудудларда давом этмоқда.

Жумладан, Қашқадарё вилоятининг Миришкор туманида ипакчилик соҳасини ривожлантириш, экологик муҳитни яхшилаш мақсадида 4 гектар майдонда “Пиллакорлар боғи” ташкил этилди.  

Боғ ҳудудида дастлаб 300 га яқин кўчат экилган бўлиб, келгусида 5 мингдан ортиқ кўчат ўтқазиш режалаштирилган. Бу ташаббус ипакчилик учун зарур бўлган табиий ресурсларни кўпайтириш, пиллачилик билан шуғулланаётган аёллар ва ёшларни қўллаб-қувватлаш ҳамда маҳаллий экологик муҳитни яхшилашга хизмат қилади.  

Ҳашар тадбири давомида йиғилганлар соҳада олиб борилаётган ислоҳотлар, ипак қуртини боқиш орқали аҳоли бандлигини таъминлаш ва даромадларини ошириш масалаларига эътибор қаратишди. Хусусан, тирик пилла етиштирувчи касаначилар учун берилган солиқ имтиёзлари ҳам эслатиб ўтилди.  

Мазкур лойиҳа келгусида нафақат ипакчиликни ривожлантириш, балки ҳудуднинг умумий кўкаламзорлаштирилишига ҳам катта ҳисса қўшиши кутилмоқда.

Гулноза Бобоева,

ЎзА