Олмалиқ кон-металлургия комбинати томонидан жорий йил январ-сентябр ҳолатига кўра, маҳсулотлар экспорти бўйича юқори натижа қайд этилди.

Жумладан, 70 минг 237 тонна мис маҳсулотлари экспорт қилиниб, режа 115,7 фоизга бажарилди.

Ўтган 9 ойда 59 минг 867 тонна мис катоди экспорти амалга оширилган, 6 минг 249 тонна мис катанкаси хорижга юборилган. Шунингдек, 4 минг 121 тонна мис қувурлари импортёрларга жўнатилган. 48 минг 627 тонна рух маҳсулотлари экспорт қилинган.

Сульфат кислотаси экспортида ҳам ҳолат аввалги ойидаги каби сақланмоқда. Жумладан, 72 минг 299 тонна сульфат кислотаси хорижга юборилиб, режа 478,8 фоизга бажарилган. Режа бўйича 9 ойда 420 тонна молибден харидорларга етказиб берилиши керак эди. Амалда эса 599 тонна молибден маҳсулотлари экспорт қилинган.

Шу билан бирга, рений, мис купороси, кадмий, вольфрам, палладий кукуни каби маҳсулотлар экспортида ҳам белгиланган натижага эришилган. Ўтган даврда 49 минг 921 тонна қўрғошин концентрати импортёрларга юборилган. Хорижлик ҳамкорларга ўтган 9 ойда 8 минг 128 тонна портландцемент, 86 минг 17 тонна цемент экспорти амалга оширилган.

ОКМК Металлургия хом ашёси билан таъминлаш ва сотиш бошқармаси маълумотларига кўра, 2021 йилнинг 9 ойида 834,001 миллион долларлик маҳсулотлар экспорт қилиниб, режа 137,8 фоизга уддаланган. Ўсиш суръати эса 150,32 фоизни ташкил этаётганини алоҳида таъкидлаш жоиз.

Комбинат маҳсулотлари асосан Туркия, Россия Федерацияси, Беларусь, Қозоғистон, Болгария, Озарбойжон, Қирғизистон, Украина, Полша, Тожикистон, Индонезия, Нидерландия, Хитой, Туркманистон ва Афғонистон каби давлатларга экспорт қилинмоқда.

А. Мусаев, ЎзА