Қозоғистон президенти Қосим-Жомарт Тоқаевнинг таъкидлашича, республикага атом электр станцияси (АЭС) керак.

"Очиғини айтиш керак: атом энергиясиз биз бутун иқтисодиётимизни йўқотамиз, инвестицияларни айтмаса ҳам бўлади, минтақавий етакчиликни қўлдан бой берамиз. Бизга электр энергияси жуда зарур, айниқса, атом электр энергияси", – деди Тоқаев сешанба куни ҳукуматнинг кенгайтирилган мажлисида сўзга чиқиб. 

Давлат раҳбарининг айтишича, республика электр таъминоти тизимида доимий узилишларга дуч келмоқда. "Бунга ёрқин мисол сифатида  яқинда мамлакат жанубидаги чироқ ўчишини кўрсатиш мумкин.  

Энергетика хавфсизлиги билан боғлиқ муаммоларни зудлик билан ҳал қилиш лозим. Мен масъул шахсларнинг атом электр станциясини қуриш ҳақидаги саволдан ўзларини силлиққина олиб қочишини ҳеч тушунмайман", – таъкидлади Қозоғистон президенти. Унинг фикрича, атом электр станциясининг аҳамиятини қозоғистонликларга очиқчасига тушунтириш лозим. 

Россиянинг Қозоғистонда АЭС қуриши билан боғлиқ масала илк бор 2019 йилда Россия президенти билан Қозоғистон раҳбари ўртасида бўлиб ўтган учрашувда кўтарилган эди. Ўшанда Россия раҳбари Владимир Путин Тоқаевга Қозоғистонда россияликлар лойиҳаси билан атом электр станциясини қуриш таклифини билдирган эди. 

2021 йил декабрда Қозоғистоннинг собиқ энергетика вазири Магзум Мирзагалиев ҳукумат АЭС қурилиши учун иккита географик нуқтани кўриб чиқаётганини маълум қилган эди. Уларнинг бири Олмаота вилоятидаги Улкен қишлоғи, иккинчиси Шарқий Қозоғистон вилоятидаги Курчатов шаҳри экани айтилмоқда. Шу билан бирга, собиқ вазир қурилиш майдонини танлаш бўйича якуний қарор қабул қилинмаганини айтганди. Февраль ойида Қозоғистоннинг ҳозирги энергетика вазири ҳам  бу масалада аниқ бир тўхтамга келинмаганини маълум қилган.