Toqaevning matbuot kotibi Berik Qurmangalining Facebookʼda ma’lum qilishicha, safar davomida BMT bosh kotibi Antoniu Guterrish va bir qator mamlakatlarning davlat va hukumat boshliqlari bilan, shuningdek xalqaro tashkilotlarning rahbarlari, Amerika biznesi, transmilliy kompaniyalari, AQSh siyosiy va ekspert doiralari vakillari bilan uchrashuvlari rejalashtirilgan. Tashrif 25 sentabrgacha davom etadi, deya xabar berdi matbuot kotibi.

BMT Bosh Assambleyasining 74-sessiyasi ishida 196 ta delegatsiya, yuzga yaqin davlat yetakchisi, BMTga a’zo 80 dan ortiq mamlakatlarning hukumat rahbari va tashqi siyosat mahkamalarining rahbarlari ishtirok etishi kutilmoqda. Xabarlarga ko‘ra, Toqaev Bosh Assambleyaning umumiy munozaralarida ishtirok etadi. Umumiy munozaralarning bu yilgi mavzusi “Qashshoqlikni bartaraf etish, sifatli ta’lim, iqlimiy harakatlar va har tomonlama yondashuvga qaratilgan ko‘p tomonlama sa’y-harakatlarni birlashtirish”dir.

Ma’lumot o‘rnida aytish kerakki, mazkur tashrif Toqaevning davlat rahbari sifatidagi AQShga ilk tashrifidir. U 2011–2013 yillarda BMT Bosh kotibining o‘rinbosari lavozimida ishlagan.