Ҳаётда шундай инсонлар бўладики, уларнинг ҳар бир нафаси, ҳар бир қадами меҳнат билан уйғунлашгандир.

Ғаллаороллик уста боғбон Олим бобо Ғайбуллаев ана шундай фидойи инсонлардан бири.

Олим бобо учун боғбонлик – нафақат касб, балки ота меросдир. У узоқ йиллар “Музбулоқ” ва “Зарбулоқ” хўжаликларида раҳбарлик қилди. Мана йигирма йилдан буён эса ўз томорқасида қилган меҳнати орқали рўзғорига барака киритиб келмоқда.

Олим бобо хонадонида бўлган киши ажойиб, кўркам бир масканга тушиб қолгандай бўлади: бир тарафда узумзор, яна бир тарафда анорзор, яна бир томонда эса анжирзор бўй кўрсатиб туради.Яна бир ёнга қарасангиз, хилма-хил турдаги ниҳоллардан иборат кўчатзорга кўзингиз тушади.

Дона халқимиз "Ерга меҳр берсанг, ер ҳам сени боқади" деб бежизга айтмаган, – дейди Олим бобо . – Томорқага қилган меҳнатимиз сабаб, кам бўлмадик. Ўн саккиз кишидан иборат оиламизнинг тўқ, фаровон ҳаёт кечиришида ана шу томорқамизнинг ўрни катта. Бу ерда етиштирилган мевалардан шарбат, қиём, мева қоқилари тайёрлаймиз. 
Бу эса дастурхонимизнинг янада тўкин бўлишини таъминлайди.

Дарҳақиқат, етмиш сотихдан иборат бу томорқада эрта баҳордан то кеч кузгача меванинг деярли барча тури навбати билан пишиб етилади. Бу йил бобо 1500 туп малинадан бир тоннага яқин ҳосил олган, ҳар килограммини 40 минг сўмдан тадбиркорларга сотган. Малина йилига икки марта – май ва сентябрь ойлари охирида ҳосил беришини ҳисобга олсак, бобонинг яхшигина даромадга эга бўлганини тахмин қилиш мумкин.

Олим бобонинг тўнғич ўғли Келдибекнинг айтишича, анор ва анжир дарахтлари 20–25 йил аввал экилган бўлиб, ҳар тупидан 75–80 килогача ҳосил олинар экан. Ҳозирда боғда олти турдаги анор ҳамда тўрт турдаги анжир навлари парвариш қилинмоқда.

– Кўчатчилик – хонадонимизнинг яна бир даромад манбаи, – дейди бобонинг тўнғич ўғли Келдибек Ғайбуллаев. – "Ризамат", "Мерседес", "Ҳусайни" каби узум навларининг кўчатларини, шунингдек, оқмағиз ёнғоқ, анжир, шафтоли ва қантак ўрик кўчатларини етиштириб, тадбиркорларга сотамиз. Яқинлар, қўшнилар, кам таъминланган оилаларга текин тарқатамиз.

Дарвоқе, оиланинг кичик ўғли Улуғбек “Асакабанк”нинг туман филиалидан “Бизнесга биринчи қадам” дастури орқали 17 миллион сўм имтиёзли кредит олиб, хонадондаги сув ҳавзасида “Маринка” балиғини парваришлашни йўлга қўйибди. Ёш тадбиркор янги йил арафасида минг тоннага яқин балиқни сотувга чиқаришни режалаштираётган экан.

Томорқани даромад манбаига айлантирган, меҳнатсевар Олим ака оиласи аъзолари йилига 200–250 миллион сўм ишлаб топмоқда. Шунинг учун айтасалар керак: "Меҳнатдан келса бойлик, турмуш бўлар чиройлик".

Абдужалол Қаюмов, ЎзА