Афғонистон Адлия вазирлиги Гулбиддин Ҳикматёр томонидан асос солинган Афғонистон Исломий партияси (АИП)) идораларини бутун мамлакат бўйлаб ёпиш, ходимларини ҳибсга олиш тўғрисида буйруқ чиқарди. Бу ҳақда “Tolo news” янгиликлар портали партия раҳбарининг ўғли Ҳабиб Ур-Раҳмон Ҳикматёрга таяниб хабар тарқатди.

Вазирлик тарқатган ҳужжатда АИПнинг барча вилоятлардаги ваколатхоналари ишини зудлик билан тақиқлаш, мавжуд иш анжомлари ва мол-мулкни мусодара қилиш бўйича кўрсатма берилган.

Таниқли сиёсий ва ҳарбий арбоб, ўтган аср 80-йилларида шўро қўшинига қарши курашган гуруҳлардан ташкил топган “Еттилик иттифоқи” етакчиларидан бири ҳисобланган Гулбиддин Ҳикматёр 1993-1994 ва 1996 йилларда Афғонистон Бош вазири эди. 2003 йил АҚШ уни террорчилар рўйхатига қўшган ва БМТ қора рўйхатига ҳам тиркаган. Сиёсатчи фақат 2017 йилга келиб оқланган. Толибон билан бирга мамлакатдаги АҚШ ва НАТО қўшинларига қарши курашган, кейинчалик қаршилик кўрсатишни тўхтатган.

Собиқ сиёсатчи кейинроқ Ҳамид Карзай коалицион ҳукумати билан тинчлик шартномасини имзолаб, тўлиқ амнистияга чиқди. Шундан сўнг унинг барча тарафдорлари қамоқдан озод қилинди. АИП конституциявий меъёрга риоя қилиш, Толибондан кейин иккинчи йирик ноҳукумат ҳарбийлашган гуруҳ ҳисобланган жангари қанотини тарқатиб юборишга рози бўлди.

2021 йил августда Толибон ҳокимиятга қайтгач, Ҳикматёр сиёсий фаолиятдан бутунлай четлатилди ва ҳатто, Кобулдаги саройидан ҳам ҳайдаб чиқарилди.

С.Раҳимов, ЎзА