Токио Хитойдан норози
Япония ўзининг дипломатик алоқа воситалари орқали Хитойга норозилик билдирди.
Япония ўзининг дипломатик алоқа воситалари орқали Хитойга норозилик билдирди. Бунга Хитойнинг 4 та патрул кемаси Японияга қарашли сувли ҳудудларга кириб келгани ва бир муддат япон балиқчилик кемасини кузатиб боргани сабаб бўлган. Воқеа жанжалли Сенкаку (хитойликлар Дяоюйдао дейишади) оролида рўй берган. Бу ҳақда “Киодо” агентлиги хабар бермоқда.
Ҳодиса жума куни кечқурун рўй берган. Хитойнинг 4 кемаси бирин-кетин Япония ҳудудига сузиб кирган ва балиқ тутаётган икки япон кемасига яқинлашиб бориб, ёнма-ён ҳаракатланишга уринган. Шунга ўхшаш воқеа ўтган йил май ойида ҳам кузатилганди.
Хитойнинг бошқа 4 та патрул кемаси шанба куни ҳам чегара яқинида пайдо бўлди ва Япония сувли ҳудудларига кириб борди.
Кўпчилик манбалар томонидан тарқатилган маълумотга таянадиган бўлсак, Япония ташқи сиёсат идорасининг норозилик баёноти телефон орқали Хитой дипломатик миссиясига ҳамда Япониянинг Хитойдаги элчихонаси ёрдамида етказилган.
Сенкаку ороллари узоқ йиллардан бери Хитой ва Япония ўртасидаги баҳсли ҳудуд ҳисобланади. Япония томони таъкидлашича, орол 1895 йилдан буён кунчиқар юртга тегишли, Пекин эса 1783 ва 1785 йилларда чизилган япон хариталарида Дяоюйдао Хитой ҳудуди сифатида қайд этилганини эслатишдан чарчамайди. Иккинчи жаҳон урушидан сўнг бу майда ороллар АҚШ назоратига ўтган ва 1972 йилда Японияга бериб юборилган. Хитойнинг ҳудудий бирлиги — Тайванда эса Япония айни ҳудудни ноқонуний эгаллаб турибди, деб ҳисоблашади. Токионинг фикрича, Хитой ва Тайвань фақат 1970 йилдан кейингина, яъни бу ердаги сув ости фойдали қазилмаларга мўл эканлиги аёнлашгач, бу оролларга даъвогарлик қила бошлади.
Умуман олганда, Япония ва Хитой ўртасидаги мазкур ороллар билан боғлиқ муносабатлар 2012 йилнинг сентябридан сўнг кескинлашди. Ўшанда Япония ҳукумати Сенкаку (Дяоюйдао) архипелагидаги беш оролдан учтасини бир япон хусусий тадбиркоридан сотиб олганди. Айнан шу ҳудудларни Пекин ўзиники деб ҳисоблайди.