Токио-2020: замонавий бешкурашчиларимиз Олимпия ўйинларига яна бир лицензияни қўлга киритишди
Хитойнинг Ухань шаҳрида давом этаётган замонавий бешкураш бўйича Осиё-Океания чемпионати спортимиз тарихи учун унутилмас воқеликларга бой бўлиши билан ёдда қолмоқда.
Хитойнинг Ухань шаҳрида давом этаётган замонавий бешкураш бўйича Осиё-Океания чемпионати спортимиз тарихи учун унутилмас воқеликларга бой бўлиши билан ёдда қолмоқда.
Аёллар ўртасида кечган беллашувлардан сўнг, энди эркаклар терма жамоасида ҳам ҳамюртимиз Александр Савкин келаси йил Токиода бўлиб ўтадиган Олимпия ўйинларига йўлланма қўлга киритди, деб хабар бермоқда МОҚ.
Мазкур мусобақада Осиё ва Океания минтақасининг энг кучли 12 терма жамоасидан аёллар ўртасида 26, эркаклар ўртасида эса 32 нафар сара бешкурашчилар баҳс олиб борди.
Таъкидлаш лозимки, терма жамоамиз ушбу спорт турида ўзбек спорти тарихида илк бор Олимпия ўйинларига йўлланмани қўлга киритди.
Кеча Алисэ Фахрутдинова аёллар ўртасида ўтказилган саралаш босқичида учинчи ўринни эгаллаб, Олимпия ўйинларига йўлланма кўлга киритган эди.
Мусобақа якунига кўра, спортчиларимиз жамоавий рейтингда бешинчи пoғонани эгаллаб, Олимпия ўйинларининг 2 та лицензиясига сазовор бўлишди.
Маълумки, замонавий бешкураш мамлакатимизда энди ривож топиб бораётган спорт турларидан бири. Боиси ушбу йўналишга авваллари деярли эътибор қаратилмас эди, аммо 2018 йил охирида федерация бошқарувида бўлган ўзгаришлар бугун ўз мевасини бермоқда.
Мусобақа якунида терма жамоаларнинг кучли бешлиги қуйидаги кўринишга келди:
1. Жанубий Корея
2. Хитой
3. Қозоғистон
4. Япония
5. Ўзбекистон
Яна бир аҳамиятли томони шундаки, Токио Олимпиадасига қўлга киритилаётган лицензиялар географияси тобора кенгайиб бормоқда. Бу эса муҳтарам Президентимизнинг спорт соҳасига қаратаётган юксак эътибори самараси ўлароқдир.
Шу тариқа, Ўзбекистон терма жамоасининг Токио-2020 Олимпия ўйинларига қўлга киритган лицензиялари сони ўн учтага (еттита спорт тури) етди.