Олимпиаданинг навбатдаги куни спортчиларимиз учун омадли келди.

Касаба уюшмалари спортчиси, оғир атлетикачимиз Акбар Жўраев "Токио–2020" Олимпия ўйинларида делегациямизга учинчи медални тақдим этди.

Даст кўтариш машқида 193 килограмм натижа қайд этиб, рақобатчиси арманистонлик Симон Мартиросяндан 2 килограмм ортда қолаётган Жўраев силтаб кўтариш машқи якунида рақибини катта фарқ билан ортда қолдириб, делегациямиз ҳисобига олтин медаль қатори Олимпиада рекордини ҳам қўшиб қўйди. Умумий натижа 430 килограмм.

Токиода музаффар спортчимиз шарафига Ўзбекистон байроғи кўтарилиб, мадҳиямиз янгради.

Бу унутилмас воқелик ўзбек спорти ва оғир атлетикаси учун жуда катта аҳамиятга эга. Қаторасига икки бор оғир атлетикачимиз Олимпиада рекорди билан чемпионликни қўлга киритмоқда.

Акбар Жўраев ва унинг яқинларини, Ўзбекистон оғир атлетика федерациясини, барча мухлисларни ушбу ғалаба билан қутлаймиз. Олимпиаданинг қолган кун дастурларида қатнашадиган вакилларимизга ҳам чиройли ғалабалар тилаб қоламиз. Олға, Ўзбекистон!

Оғир атлетика, -109 кг:

1. Акбар Жўраев (Ўзбекистон) – 430 (193+237) кг Олимпиада рекорди;

2. Симон Мартиросян (Арманистон) – 423 (195+228) кг;

3. Артурс Плесниекс (Латвия) – 410 (180+230).

З.ЖОНИБЕКОВ, Анвар ИЛЬЯСОВ (сурат), ЎзА