Shu yil 10 avgustdan boshlab Eron va Tojikiston o‘rtasida vizasiz rejim amal qiladi. Bu haqda Tojikiston Tashqi ishlar vazirligi ma’lum qilgan.

– 2024 yil 10 avgustdan boshlab Tojikiston Respublikasi va Eron Islom Respublikasi hukumatlari o‘rtasida oddiy pasport egalari uchun vizani bekor qilish bo‘yicha o‘zaro anglashuv memorandumi kuchga kiradi, – deyilgan vazirlik xabarida.

Mazkur hujjatga asosan har ikki tomon oddiy xorijiy pasport egalari sherik davlat hududiga kirgan sanadan boshlab 90 kun ichida 30 kunlik muddatga vizasiz tashrif buyurish huquqiga ega bo‘ladi.

Aniqlik kiritilishicha, birinchi bosqichda vizasiz tizim faqat Dushanbe – Tehron va Tehron – Dushanbe yo‘nalishi bo‘yicha havo qatnovidan foydalanganlar uchun amal qiladi.

O‘zA