Аввал хабар берганимиздек, Фарғонада биринчи тинчлик форуми бўлиб ўтмоқда. Унинг ишида ўттиздан зиёд давлат, халқаро ташкилотларнинг 300 дан ортиқ вакиллари, сиёсатчи, дипломат, олимлар иштирок этяпти.

Унда минтақада тинчликни мустаҳкамлаш, иқтисодий ҳамкорликни ривожлантириш, яқин келажак йиллар ҳаракат харитаси юзасидан келишувлар тузиш имкони яратилди.

Фарғона водийнинг ҳар жиҳатдан ривожланган, аҳолиси энг кўп вилоятидир. Шунинг учун ҳам Фарғона вилояти ҳокими Хайрулло Бозоров Сўғд вилояти раиси Ражаб Аҳмадзода, Қирғиз Республикаси Президентининг Боткен вилояти бўйича вакили Айбек Шаменов, Шанхай ҳамкорлик ташкилоти бош котибининг ўринбосари Сухэл Хан ҳамда Европа Иттифоқининг Марказий Осиё бўйича махсус вакили Эдуард Стипрайсни қабул қилди. Бўлиб ўтган музокаралар чоғида томонлар иқтисод, савдо ва маънавият соҳасидаги ҳамкорликнинг босиб ўтилган йўлини таҳлил қилдилар ва келгуси режалар юзасидан фикр алмашдилар. Эдуард Стрипрайс Европа Иттифоқи Фарғона вилоятида таълим ва касбий таълим соҳасига инвестиция киритиш устувор масала эканини, бу аҳоли сони узлуксиз ортиб бораётгани учун ҳам аҳамият касб этишини таъкидлади ҳамда ҳамкорликни таклиф қилди.

– Европа Иттифоқи давлатлари билан Фарғона вилояти ўртасидаги товар айланмаси йилдан-йилга ўсиб бораяпти, –деди Фарғона вилояти ҳокими Хайрулло Бозоров. – Бу давлатимиз раҳбарининг очиқлик сиёсати туфайлидир. Илгарилари дунёнинг йирик сиёсий тузилмасининг юқори мартабали вакили билан вилоят ҳокими тўғридан - тўғри музокара олиб боришини тасаввур ҳам қилиб бўлмас эди. Кўриб турганингиздек, бу амалга ошди. Демак, ҳали ҳамкорлик истиқболларининг йўли узун.

Фарғона биринчи тинчлик форуми иши давом этмоқда.

<iframe width="640" height="420" src="https://www.youtube.com/embed/fCUwWvANQCA" title="To‘g‘ridan -to‘g‘ri munosabatlar samarasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов(видео),

Муқимжон Қодиров(сурат), ЎзА