ТМД миссиясы аясында Өзбекстан Республикасының референдумына байқаушы ретінде қатысып жатқан қазақстандық Айжан Шайназарова мен Мұрат Сандибаев 5-Науаи округтік комиссиясының қызметімен танысты.

Округтік комиссияның баспасөз орталығының хабарлауынша, байқаушылармен бірге комиссия төрағасы Назира Тоғаева және басқалар Өзбекстан Республикасының референдум өткізу туралы заңнамасы және оның аясында атқарылып жатқан жұмыстар туралы хабардар етті. Референдум үдерістерінің демократиялық қағидаттарға сай жүргізілетіні атап өтілді.

Бұдан кейін халықаралық байқаушылар референдум учаскелеріндегі дауыс беру үдерістерін онлайн-бейнетаспа арқылы көрсетуге қатысты мәселелерге қызығушылық танытып, Кенимех ауданындағы 160-шы референдум учаскесінде болды.

[gallery-11671]

– Референдум үдерістерінің осынау шалғай аудандарда да онлайн көрсетіліп жатқаны – елдің ашықтығы мен демократиялық ұстанымдардың басымдылығының іс жүзінде дәлелі. Референдум өткізу үшін сайлау учаскелерінің халықаралық стандарттарға сай дайындалуы халықтың өз еркін білдіруіне мүмкіндік береді, – дейді бақылаушы А. Шайназарова.

Бақылаушылар сайлау мен референдум өткізуде бай тәжірибесі бар Өзбекстанда бүгінгі күні де референдум демократиялық, еркін және ашық өтетініне сенім білдірді.