Deloitte компаниясы 2024/2025 маусымында ең жоғары табысқа қол жеткізген футбол клубтарының рейтингін жариялады.

Өткен маусымда 1,16 млрд еуро табыс тапқан «Реал Мадрид» екінші рет қатарынан рейтингте көш бастады. Бұған дейін мадридтік клубтың табысы 1,05 млрд еуроны құраған болатын.

Айта кетерлігі, «Реал» 2024/2025 маусымында бірде-бір жүлдеге қол жеткізе алмады.

2019/2020 маусымынан кейін алғаш рет үздік үштікке қайта оралған «Барселона» екінші орынға жайғасты — 974,8 млн еуро. Үшінші орында — «Бавария» (860,6 млн еуро),
төртінші орында — «Пари Сен-Жермен» (837 млн еуро).

Бесінші орынды иеленген «Ливерпуль» (836,1 млн еуро) бұл межеге жеткен Англия клубтары арасындағы алғашқы команда атанды. Клуб Чемпиондар лигасына қайта оралуы және коммерциялық табысының 7 пайызға өсуі есебінен сегізінші орыннан бесінші сатыға көтерілді.

Рейтингке енген 20 клубтың жалпы табысы 12,4 млрд еуроны құрады. Бұл көрсеткіш 2023/2024 маусымымен салыстырғанда 11 пайызға жоғары.