Дунёнинг 372 нафар энг маҳоратли шахматчилари иштирокида онлайн тарзда ўтказилган “Titled Tuesday” турнирида 6 нафар ҳамюртимиз дона сурди.

Жаҳон шахматида ўз ўрнига эга бўлган Магнус Карлсен, Арджун Эригайси, Хикару Накамура, Маттиас Блюбаум, Пархам Магсудлу каби маҳоратлилар қатнашган 11 турдан иборат турнирда ўзбекистонлик шахматчилардан Нодирбек Абдусатторов, Шамсиддин Воҳидов, Нодирбек Ёқуббоев, Афруза Ҳамдамова, Алмаз Раҳматуллаев ва Шаҳзод Хамзаев ўз омадини синовдан ўтказди.

Турнирда норвегиялик Карлсен 9,5 очко билан ғолибликка эришган бўлса, кейинги ўринлар 9 очко жамғарган арманистонлик Хайк Мартиросян ва АҚШ вакили Сэм Севианга насиб этди.

Ўзбекистонлик шахматчилардан Шамсиддин Воҳидов 8 очко билан 14-ўриндан жой олди. Н.Ёқуббоев ва Н.Абдусатторов 7,5 очко тўплаган ҳолда 23 ва 26-поғоналардан, А.Ҳамдамова 7 очко эвазига 65, А.Раҳматуллаев 3 очколи бўлган ҳолатда 250-қатордан ўрин олди.

Т.Рўзиев, ЎзА