Heavenly Culture, World Peace, Restoration of Light (HWPL) ташкилотининг Тинчлик саммитига 7 йил тўлиши муносабати билан онлайн тарзда тадбир бўлиб ўтди.

   Бу йилги тадбирлар халқаро саъй-ҳаракатларнинг кучайишига ва COVID-19 дан кейинги ва COVID-19 шароитида ҳаёт кечириш даврида тинчлик ҳаракатларини олиб боришга бағишланди.

Саммитда YouTube орқали 157 мамлакатдан 30 мингдан зиёд киши иштирок этди, яна 2500 киши Zoom конференциялари орқали қатнашди.

Мазкур саммитни ташкил этган БМТнинг ЭКОСОС ташкилоти ҳузуридаги Heavenly Culture, World Peace, Restorationof Light (HWPL) халқаро ташкилоти 2014 йилда ўтказган тинчлик саммитидан кейин сайёрамизда “тинчлик маданияти”ни яратиш учун фуқароларнинг тинчликпарварликка йўналтирилган тадбирларини  ўтказиб келади. Мазкур ҳаракат БМТ ва ҳалқаро ҳамжамият томонидан қўллаб-қувватлаб келинмоқда.

«Биз,  барчамиз бир бўлиб ушбу йўналишда иш олиб бормасак, тинчликка эришиш осон эмаслигини яхши биламиз. Шу боис  болаларни, ёшларни ва катталарни бир-бирини ҳақорат қиладиган гаплардан тийилишга чақиришимиз зарур ва янада адолатли, барқарор ва тинч дунёга эришиш учун инсонлар ўртасида тенгсизликка барҳам беришимиз лозим», – дейди Эквадорнинг собиқ президенти Росалия Артеага Серрано.

«Бизнинг мақсадимиз – сайёрамизда урушларга барҳам бериш, тинчлик ўрнатиш ва уни келажак авлод учун абадий мерос қилиб қолдириш. Агар тинчлик бўлмаса, инсоният нимани барпо этган бўлса ҳаммаси вайрон бўлади, биз бунга асло  йўл қўймаслигимиз керак. Тинчликка эришиш учун ҳаммамиз биргаликда ушбу мақсадни рўёбга чиқаришимиз керак бўлади», – дея таъкидлади HWPL раиси  Ли Ман Хи.

Мазкур саммитда мустаҳкам тинчликни қарор топтириш учун халқаро ҳуқуқ,  дин, таълим ва оммавий аъборот воситалари каби турли йўналишларда биргаликдаги саъй-ҳаракатлар тақдим этилган. Сўзга чиққанлар айниқса, пандемия даврида долзарблиги янада ошган  ва инсониятнинг яшаб қолишига таҳдид солаётган ҳозирги инқирозни енгиб ўтиш учун барчани халқаро ҳамкорликка чақирдилар.