Маълумки, шу кунларда давлатимиз раҳбари амалий ташриф билан Америка Қўшма Штатларида бўлиб турибди. Ташриф доирасида янги халқаро мулоқот майдони – Тинчлик кенгашининг биринчи йиғилишида иштирок этиш режалаштирилган. Мазкур тузилма глобал ва минтақавий можароларни сиёсий-дипломатик йўл билан ҳал этишга қаратилган кўп томонлама механизм сифатида шаклланмоқда.

Эътиборлиси, Тинчлик кенгашини таъсис этиш бўйича келишув жорий йил январь ойида Давос шаҳрида ўтган Жаҳон иқтисодий форуми доирасида имзоланган эди. Ўзбекистон мазкур ташаббусни илгари сурган ва қўллаб-қувватлаган таъсисчи давлатлар қаторида қатнашди. Бу эса мамлакатимиз ташқи сиёсатининг музокара ва келишувларга таяниш тамойилига тўлиқ мос келади.

ЎзА мухбири ушбу ташрифнинг аҳамияти хусусида Ўзбекистон Республикаси Президенти ҳузуридаги Давлат сиёсати ва бошқаруви академияси проректори Шамсиддин Валиев фикрларини ёзиб олди.

– Президентимизнинг АҚШга ташрифи юртимиз ташқи сиёсий масалалари борасида амалга оширилаётган ислоҳотларнинг мантиқий давоми сифатида муҳим аҳамият касб этмоқда. Давлатимиз раҳбари янги халқаро тузилма — Тинчлик кенгашининг биринчи мажлисида иштирок этади. 

Айтиш керакки, ушбу платформа глобал ва минтақавий можароларни сиёсий-дипломатик йўл билан ҳал этишга қаратилган кўп томонлама мулоқот механизми сифатида майдонга чиқмоқда.

Маълумки, Тинчлик кенгашини таъсис этиш тўғрисидаги келишув жорий йил январь ойида Давос шаҳрида имзоланган. Ўзбекистон мазкур ташаббусни илгари сурган ва қўллаб-қувватлаган таъсисчи давлатлар қаторида бўлди. Таъкидлаш жоиз, мамлакатимиз доим можароларни куч ишлатмасдан, музокаралар орқали ҳал этиш ғоясини илгари суриб келмоқда.

Эътиборлиси, Президентимизнинг мазкур ташрифи сўнгги ойларда фаоллашган Ўзбекистон-АҚШ муносабатлари билан ҳамоҳанг тарзда кечмоқда. Умуман олганда, Ўзбекистон етакчисининг Тинчлик кенгаши биринчи йиғилишидаги иштироки ўлкамизнинг халқаро майдондаги нуфузи тобора ортиб бораётганидан далолат.

ЎзА мухбири Дилшод Ҳакимов ёзиб олди.