АҚШ “Тинчлик Кенгаши”нинг ваколатлари Ғазо секторидан ташқарига чиқишини эълон қилди, деб ёзмоқда “Axios” янгиликлар портали.

Таъкидланишича, бу ёндашувдан хавотирда бўлган баъзи иттифоқчилар Оқ уй раҳбарининг ташаббусини “БМТ Хавфсизлик Кенгашига рақобатбардош янги тузилма яратишга уриниш” деб ҳисобламоқда. Шу боис, Франциядан кейин Буюк Британия, Германия, Нидерландия ва Швеция ҳам “Тинчлик Кенгаши”га қўшилмасликка қарор қилишди.

“Bloomberg” маълумотларига кўра, бу ўлкалар таклифни рад этишган ва Давосда бўлиб ўтадиган низомни имзолаш маросимида қатнашмайди.

Маълумки, Франция айни таклифни биринчи бўлиб рад этган эди. Париж Трампнинг режаси БМТга путур етказиши ва АҚШнинг Франция ташқи сиёсатига ортиқча таъсир кўрсатиши мумкинлигини таъкидлади. Исроил ҳам режага эътироз билдириб, “Тинчлик Кенгаши”нинг Ғазо қўмитаси “Исроил билан мувофиқлаштирилмаган ва унинг сиёсатига зид”, айниқса Қатар ва Туркия вакилларининг иштироки туфайли, деб даъво қилмоқда.

Италия эса воситачилик ролини ўйнашга тайёрлигини билдириб, ушбу ташаббусда ўз ёрдамини таклиф қилган.

С.Раҳимов, ЎзА