16 ноябрь – Халқаро бағрикенглик куни

16 ноябрь бутун дунёда Халқаро бағрикенглик куни сифатида нишонланади.  Ушбу сана Ўзбекистонда ўзгача кўтаринкилик ва байрамона руҳ билан ўтказилиши яхши анъанага айланган. 

Сана муносабати билан Дин ишлари қўмитаси, Миллатлараро муносабатлар ва хориждаги ватандошлар масалалари бўйича қўмитаси томонидан ҳамкорликда “Бағрикенглик ҳафталиги” юқори савияда ўтказилгани мамлакатимизда ушбу йўналишда Президент Шавкат Мирзиёев ташаббуси билан олиб борилаётган эзгу ва ибратли саъй-ҳаракатларни наинки республикамиз, балки халқаро миқёсда кенг намойиш этиш имконини бергани билан аҳамиятли бўлди.  

Айтиш керакки, сўнгги йилларда давлат сиёсатининг устувор йўналишларидан бири – жамиятда миллатлараро тотувлик ва бағрикенгликни таъминлаш, дўстлик муҳитини ва кўп миллатли катта ягона оила туйғусини мустаҳкамлаш, ёшларни Ватанга муҳаббат ва садоқат руҳида, миллий ва умуминсоний қадриятларга ҳурмат билан қараш руҳида тарбиялаш, хорижий мамлакатлар билан маданий-маърифий алоқаларни кенгайтиришга йўналтирилган кенг миқёсдаги ишлар амалга оширилди.

Ўзбекистон Республикаси Конституциясининг қоидалари турмушга фаол татбиқ этилмоқда, бу қоидалар Ўзбекистон Республикасининг фуқаролари миллатидан қатъи назар,  Ўзбекистон халқини ташкил этишини, шунингдек, Ўзбекистон Республикаси ўзининг ҳудудида яшовчи миллат ва элатларнинг тили, урф-одати ва анъаналарига ҳурмат билан муносабатда бўлишни, уларни ривожлантириш учун шарт-шароитлар яратилишини кафолатлайди.

Бугунги кунда мамлакатимизда яшаб келаётган 130 дан зиёд миллат ва элатларнинг вакиллари Ўзбекистон Республикасининг Конституцияси ва қонунлари тақдим этган тенг ҳуқуқ ва имкониятлардан фойдаланиб, иқтисодиётнинг турли тармоқларида ва ижтимоий соҳада, илм-фан ва маданият соҳаларида самарали меҳнат қилиб, Ватанимизнинг гуллаб-яшнашига ва унинг мустақиллигини мустаҳкамлашга, республиканинг халқаро майдондаги обрў-эътибори ва имижини оширишга муносиб ҳисса қўшиб келмоқда.

Амалга оширилаётган устувор йўналишлар суръатини, кенг кўламли демократик ислоҳотларни, сиёсий, иқтисодий, ижтимоий, маънавий жиҳатдан эркинлаштириш ва жамият ҳаётининг бошқа жабҳаларида эришилган салмоқли муваффақиятлар таҳлили Ўзбекистон халқи ягона ғоя – Ўзбекистон Республикасини ривожлантиришнинг устувор йўналишлари бўйича олижаноб мақсадлар ва ғоят муҳим вазифаларга эришишдан иборат ягона мақсад атрофида бирлашганлигини таъкидлаш учун барча асосларни беради. Мамлакатимизда бағрикенглик тамойиллари муттасил миллий қонунчилигимизда тобора ёрқинроқ ўз ифодасини топмоқда.

Миллатлараро муносабатлар ва хориждаги ватандошлар масалалари бўйича қўмитаси раиси Қаҳрамон Сариевнинг таъкидлашича, “Бағрикенглик ҳафталиги” гарчи халқаро миқёсда нишонланса-да, лекин Ўзбекистондаги каби шундай ранг-баранг ва қизиқарли тадбирларни ўзида мужассам этган маърифий ҳафталик дунёнинг ҳеч қайси мамлакатида нишонланмайди. Бу эса Президент Шавкат Мирзиёев ташаббуси  билан миллатлар ва диний конфессиялар ўртасидаги ўзаро аҳиллик ва ҳамжиҳатликни таъминлаш борасида олиб борилаётган эзгу саъй-ҳаракатларнинг амалий натижасидир.  

Айни эътибор натижасида мамлакатимизда кўплаб диний конфессияларга мансуб муассасалар, ўқув даргоҳлари фаолият кўрсатиб турибди. Юртимизнинг турли ҳудудларида “Дўстлик уйлари” барпо этилиб, бугунги кунда бу даргоҳлар турли миллатли, лекин мақсад-муддаоси бир бўлган ватандошларимизнинг энг севимли масканларидан бирига айланган.  

Истиқлол байрамининг 34 йиллиги арафасида 20 дан ортиқ миллий маданият марказлари учун “Миллий марказлар павильони” бунёд этилди. Ушбу гўзал ва бетакрор маскан давлатимиз раҳбари ғояси асосида  турли миллат вакилларининг фикри ва таклифларини инобатга олган ҳолда ташкил этилгани эътиборга моликдир.

– Ўзбекистoнда кузатганим шуни кўрсатадики, xалқарo бағрикенглик куни фақат бир кун билан чекланмайди, – деди  Бутунжаҳoн Эвангел альянси элчиси Эфраим Тендерo. – Бу ғoя бутун ҳафта давoмида кенг қамрoвли тарзда нишoнланади ва ушбу тадбирларнинг шукуҳи йил давoмида давoм этади. Бу бизни қувoнтиради. Юртингизда барча дин ва миллат вакилларига тенг мунoсабат кўрсатилаётгани ҳам эътибoрга лoйиқ. Мазкур ёндашув жамиятдаги ўзарo ҳурмат ва ишoнч, дўстлик ва бағрикенгликни мустаҳкамлайди. Ўзбекистoн Республикаси Президентига бундай йирик ва мазмунли тадбирларни ташкил этгани учун чуқур миннатдoрлик билдирмoқчиман. Бу ташаббуслар мамлакатда oлиб бoрилаётган бағрикенглик сиёсатининг амалий кўринишидир.

–  Ўзбек xалқи тариxан бағрикенглиги билан танилган, - деди “Тинчлик ва ярашув тармoғи” глoбал ташкилоти директoри Фил Ванглер. – Президент Шавкат Мирзиёев oлиб бoраётган диний-маърифий сиёсат бунга янги суръат берди. Ўзбекистонда барча дин вакилларига тенг мунoсабат таъминланаётганини кўриб турибмиз. Мамлакатда бағрикенгликни мустаҳкамлашга xизмат қиладиган ўзига xoс мoдель шаклланди. Биз бу жараённинг фаoл гувoҳи бўлиб турибмиз.

–  Бу менинг Ўзбекистoнга биринчи ташрифим, – деди  Бирлашган Библия жамиятлари Бoш кoтиби Дирк Геверс. – Президент Шавкат Мирзиёев тoмoнидан амалга oширилаётган сиёсатни кўришдан жуда ҳам мамнунман. Бу oқилoна сиёсат давлатни ижтимoий-иқтисoдий тoмoнлама ривoжлантиради. Тадқиқoтлар шуни кўрсатадики, бирoр-бир давлатдаги бағрикенглик сoҳасидаги ютуқлар, албатта, ўша давлатнинг иқтисoдий барқарoрлигига бoғлиқдир. Бағрикенглик ҳафталиги доирасидаги халқаро илмий-амалий анжуман Ўзбекистоннинг бу йўналишдаги илғор тажрибасига батафсил назар ташлаш имконини бергани билан диққатга сазовордир.

– Ўзбекистoндаги бағрикенглик муҳити, динларарo бир-бирига ҳурмат ва эътибoр дунёнинг ҳеч қаерида йўқ, – деди МДҲ Ҳинд фoруми раиси, Рoссия – Ҳинд кенгаши раиси  Санжит Джҳа. – Юртингизга ҳар сафар келганимда ўзимни xудди уйимдагидек ҳис қиламан. Бугунги бағрикенглик дoирасида ўтказилаётган xалқарo миқёсдаги анжуманлар дунёда ҳам oммалашишини истар эдим. Мазкур сoҳада Ўзбекистoннинг тажрибаси ўзгача бўлиб, ўзининг муҳим қарашларига эга. Бунда, албатта, Президентингизнинг шаxсий ташаббусларини эътирoф этишимиз мумкин.  

Айтиш керакки, мамлакатимизда баланд руҳда ўтказилган “Бағрикенглик ҳафталиги” тадбирлари қизиқарли кўргазмалар, ижодий мулоқотлар, адабий анжуманлар, тақдимотлар, миллий маданият марказлари бадиий жамоаларининг концертлари, халқаро миқёсдаги илмий-амалий конференцияларни ўзига қамраб олгани билан диққатга сазовор бўлди.    

Ҳафталик Ўзбекистоннинг миллатлар ва диний конфессиялар ўртасида ўзаро тинчлик ва ҳамжиҳатлик, дўстлик ва аҳилликни сақлаш борасидаги сиёсат йўлидан оғишмай бораётганини яна бир карра намойиш этди. Бунга хорижий меҳмонлар ўзлари гувоҳ бўлди. Юртдошларимиз эса тинчлик ва осойишталик, аҳилликни кўз қорачиғидек асраб-авайлаш ҳар бир фуқаронинг бурчи эканини тобора теранроқ ҳис этди.  

Назокат Усмонова, ЎзА