FOTOREPORTAJ

O‘zbekiston Respublikasi Mudofaa vazirligida “Yangi hayot uchun, Yangi O‘zbekiston uchun!” shiori ostida bayram tadbiri o‘tkazildi. Unda harbiy xizmatchilar, Oliy Majlis Qonunchilik palatasi deputatlari, el suygan san’atkorlar, davlat va jamoat tashkilotlari vakillari ishtirok etdi.

Tantanada mudofaa vaziri, general-leytenant Bahodir Qurbonov barchani eng ulug‘, eng aziz ayyom bilan qutlar ekan, mustaqillik ko‘hna tariximiz, boy merosimiz, milliy davlatchiligimiz, muqaddas dinimiz, urf-odat va an’analarimizni qayta tiklagani bilan yanada qadrli ekanini, bugun O‘zbekiston mustaqil davlat sifatida ulkan salohiyatini butun dunyoga namoyon qilayotganini qayd etdi.  

Mustaqillik haqida so‘z borar ekan, davlat va jamiyat hayotining barcha jabhasida, jumladan, Qurolli Kuchlar tizimida amalga oshirilayotgan islohotlar haqida to‘xtalib o‘tmaslikning iloji yo‘q. Shu ma’noda o‘tgan davr mobaynida mamlakatimiz mudofaa qobiliyati yanada mustahkamlanib, xalqimizning tinch hayoti va farovonligini ta’minlash, demokratik islohotlarni muvaffaqiyatli amalga oshirishning ishonchli kafolati bo‘lib xizmat qilayotgani tilga olindi.  

[gallery-13345]

So‘ng O‘zbekiston Respublikasi Prezidenti Farmoniga muvofiq milliy manfaatlarimizni himoya qilish va tinchlikni ta’minlash borasida alohida mardlik, jasorat va fidoyilik ko‘rsatgan bir guruh harbiy xizmatchilar va Qurolli Kuchlar xizmatchilariga Vatanimizning yuksak mukofotlari tantanali ravishda topshirildi. Yana bir guruh harbiy xizmatchilar navbatdagi hamda egallab turgan lavozimidan bir pog‘ona yuqori harbiy unvonlar, “Namunali xizmati uchun” va boshqa ko‘krak nishonlari, mudofaa vazirining esdalik nishoni va faxriy yorliq bilan taqdirlandi.

Bayramda xizmat burchini bajarish chog‘ida jarohat olgan, halok bo‘lgan harbiy xizmatchilarning oila a’zolari ham e’tibordan chetda qolmadi. Ularga pul mukofotlari va mudofaa vazirining esdalik nishoni berildi. Shu kuni Qurolli Kuchlar faxriylariga va Mudofaa vazirligi bilan faol hamkorlik qilib kelayotgan san’atkorlarga ham shunday ehtirom ko‘rsatildi.

Qurolli Kuchlar Markaziy ashula va raqs ansambli xonandalari ijrosidagi kuy-qo‘shiqlar tantanaga o‘zgacha shukuh bag‘ishladi.

O‘zA suratlari.