Буюк Британия мудофаа вазирлиги “душман мамлакатларни” кузатиб бориш учун бир нечта ҳаво шарларини сотиб олиш масаласини ўрганиб чиқмоқда. The Times газетасининг сешанба кунги сонида айтилишича, ўтган йили Британия ҳукумати 100 миллион фунт стерлингга Американинг Sierra Nevada Corporation компанияси билан стратосферада парвоз қиладиган ҳаво тизимни ишлаб чиқиш бўйича келишувга эришган.

Нашрнинг таъкидлашича, ушбу йўналишдаги ишлар Британия мудофаа вазирлигининг  Aether деб номланган лойиҳаси доирасида амалга оширилмоқда.  

Ҳаво шарлари 15-24 километр баландликда учиши мумкин.  

Бундан ташқари, The Times нашрининг ёзишича Британия ҳарбийлари стратосферада ҳаракат қиладиган  конвенциональ учувчисиз ўзи учар қурилмаларни ишлаб чиқариш учун инвестиция жалб қилиш масаласини ҳам ўрганмоқда.  

Январнинг сўнгги кунлари АҚШ ҳукумати мамлакат осмонида Хитойнинг аэростати  учиб ўтаётганини аниқлаган эди. 4 февралда эса у уриб туширилди. Пентагоннинг таъкидлашича, шар муҳим маълумотларни тўплаш учун учирилган. Хитой эса шарни метеорология зонди эканини таъкидлаб, АҚШ ҳаво ҳудудига тасодифан кириб борганини айтди.