Япониядаги олий таълим муассасасига ўқишга кириш учун у қайси давлат фуқаролигидан қатъий назар мулоқот даражасида япон тилини билиши шарт.

Жанубий Корея, Германияда ўқиш ва ишлаш учун ҳам шу мамлакат давлат тилини билиши талаб этилади.

Ҳали Ўзбекистонда бундай меъёр қабул қилинмаган. Лекин Фарғона жамоат саломатлиги тиббиёт институтида хорижий талабаларга ўзбек тили ўқитилиши таълим дастурига киритилган. Бу ерда талаба ўқув машғулотлари олиб бориладиган инглиз тили қаторида ўзбек тилини ҳам ўрганиши, билиши лозим.

– Ҳозирги кунда Фарғона жамоат саломатлиги тиббиёт институтида икки мингга яқин 6 та давлатдан келган хорижий талабалар таҳсил олмоқда. Биз уларга ўзбек тилини ўргатмоқдамиз, – дейди ўзбек ва хорижий тиллар кафедраси катта ўқитувчиси Моҳитобон Комилова. – Яъни улар ўзбек тилида сўзлашиш, ёзиш кўникмаларини ўрганиб боришмоқда. Чунки бу уларнинг кундалик фаолиятлари учун жуда зарур.

Эътиборлиси шундаки, хорижлик талабаларда ўзбек тилига қизиқиш жуда катта. Улар асосий тиббий фанлар қаторида ўзбек тилини астойдил ўрганмоқда. Бунда бадиий асарлар муҳокамаси, касбий терминлар мутоласи катта аҳамиятга эга.

– Мен Ҳиндистондан келганман. Келганимга уч ярим йил бўлди. Бу йил 3- босқичда ўқияпман, – дейди Ҳимагири Надиминти. – Ўқитувчиларимиз ўзбек тилини ўрганишимизга ёрдам беришади. Қолаверса, кутубхонада тил ўрганиш учун ҳамма китобларни топиш мумкин.

Институтда ўзбек тили ўқитилишининг ўзига хос хусусиятлари, услуб ва йўналишлари ҳам бор.

– Талабалар клиникаларга бориб беморлар билан мулоқот олиб боради. Бу эса  шифокор учун биринчи навбатдаги касб қоидаси ҳисобланади. Шунинг учун биз талабаларимизга айнан тиббиёт йўналишидаги ўзбек тилини ўргатамиз, – дейди педагогика фанлари доктори, профессор Ирода Иминахунова. – Кўп мавзуларимиз беморлар билан суҳбат олиб бориш, улардаги касаллик белгиларини аниқлашга мосланган. Хорижлик талабалар учун бепул ўзбек тили курсларини ташкил этганмиз.    

<iframe width="650" height="420" src="https://www.youtube.com/embed/jE7wSwIOdK0" title="Til bilish ixtiyoriy emas, majburiyat" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео, сурат), ЎзА