Фарғонада кейинги пайт япон тилига қизиқиш ошиб кетди. Аммо ўқув курслари барчани қабул қила олмайди. Сабаби – япон тили ҳозирча Политехника институти талабаларига ўргатилмоқда. Бунинг асосли сабаби бор эди, албатта.
– Агар Ўзбекистонда 30 ёшгача бўлганлар аҳолининг 70 фоизини ташкил этса, Японияда эса бунинг акси. Шунинг учун бизга оддий ишчи кучи эмас, иқтисосликка эга мутахассислар зарур, – дейди Япон тили ўқитиш маркази муассиси Мизутам Татцуо. –Фарғонада очилган Япон тили ўқитиш маркази келгусида Япония компания ва корхоналари учун япон тилини биладиган мутахассислар етказиб беришга кўмаклашади. Ҳа, ҳаётнинг, замоннинг ажабтовур ҳақиқатларидан бири шуки, Япония дунёда энг узоқ умр кўрувчилар мамлакати. Рақамлар тили билан айтилса, 2023 йилда юз ёшдан ошганлар 123 минг нафарга етди. Энг кекса япон эса 122 ёшда экан. Ҳозир гап узоқ умр кўриш сирлари ҳақида эмас. Балки у келтириб чиқараётган муаммо... ҳа-ҳа, муаммо ҳақида. Гап шундаки, иш билан бандлар сони камайиб, нафақа олувчилар сони эса ортиб бориши кузатилмоқда. Натижада мамлакатнинг олий маълумотли ёш мутахассисларга эҳтиёжи тобора ошмоқда. Фарғонада япон тили ўқитиш марказининг очилиш сабабларидан бири ҳам ана шу глобал масала ечими доирасига киради.
Шуни айтиш керакки, Фарғона политехника институтида илгари ҳам чет тиллари ўқитилар эди. –Талабаларга бўш вақтларида тилларни ўргатишни йўлга қўйдик. Биз инглиз, рус, турк мана энди япон тилини ҳам ўқитмоқдамиз, – дейди Фарғона политехника институтидаги тиллар маркази бошқарувчиси Адҳамжон Тоштемиров.
Тил ўрганиш албатта тўловли. Аммо институт ўз талабаларига катта имтиёз яратган ва рамзий миқдордаги тўловни амалга оширган унинг талабалари асосий дарслардан бўш вақтларда турк, инглиз, рус, япон тилларини ҳам ўрганишмоқда.
<iframe width="560" height="315" src="https://www.youtube.com/embed/pX8pNALNvAo?si=4KZ8G3gudQA5is2x" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>Муҳаммаджон Обидов,
Элёр Олимов (видео), ЎзА